തിരുവനന്തപുരം: തൃശൂർ പൂരം അലങ്കോലപ്പെട്ടതിനെ കുറിച്ചുള്ള എഡിജിപിയുടെ അന്വേഷണ റിപ്പോർട്ട് ഡിജിപി ഇന്ന് പരിശോധിക്കും. 5 മാസത്തിന് ശേഷം ഇന്നലെയാണ് അന്വേഷണം പൂർത്തിയാക്കി എഡിജിപി എം ആര് അജിത് കുമാർ 600 പേജുള്ള അന്വേഷണ റിപ്പോര്ട്ട് സമര്പ്പിച്ചത്.
സിറ്റി പൊലീസ് കമ്മീഷണറായിരുന്ന അങ്കിത് അശോകനുണ്ടായ ഏകോപനത്തിലെ വീഴ്ചയല്ലാതെ മറ്റൊന്നും റിപ്പോർട്ടിൽ പറഞ്ഞിട്ടില്ലെന്നാണ് വിവരം. തൃശൂർ പൂരം നടന്ന രാത്രിയുണ്ടായ സംഭവങ്ങൾ വിവരിച്ചുള്ള കാര്യങ്ങളാണ് റിപ്പോർട്ടിലുള്ളതെന്നാണ് സൂചന.
ഒരാഴ്ചക്കുള്ളിൽ അന്വേഷണ റിപ്പോർട്ട് സമർപ്പിക്കാനായിരുന്നു നിര്ദേശമെങ്കിലും ഏറെ വിവാദങ്ങൾക്കൊടുവിലാണ് ഇപ്പോൾ അന്വേഷണ റിപ്പോർട്ട് സമർപ്പിച്ചിരിക്കുന്നത്.
ഡിജിപി ഓഫീസിൽ ഇല്ലാത്തതിനാൽ ആണ് ഇന്ന് റിപ്പോര്ട്ട് പരിശോധിക്കുന്നത്. അന്വേഷണ വിവരങ്ങളും മൊഴികളും ഇതിൽ ഉൾപ്പെടുന്നു. എഡിജിപിയുടെ സാന്നിധ്യം കൂടി ഉള്ളപ്പോഴാണ് പൂരം അലങ്കോലപ്പെടുന്നത്. ഈ സാഹചര്യത്തിൽ എഡിജിപിയുടെ കണ്ടെത്തലെന്ത് എന്നത് നിർണായകമാണ്.
