എറണാകുളം: ക്ഷേത്രങ്ങൾ സിനിമാ ഷൂട്ടിംഗിനുള്ള സ്ഥലമല്ലെന്ന് ഹൈക്കോടതി. ഭക്തർക്ക് ആരാധനയ്ക്കുള്ള സ്ഥലമാണ് ക്ഷേത്രങ്ങളെന്നും ഹൈക്കോടതി പറഞ്ഞു. തൃപ്പൂണിത്തുറ പൂർണത്രയീശ ക്ഷേത്രത്തിൽ സിനിമാ ഷൂട്ടിംഗ് അനുവദിച്ചത് ചോദ്യം ചെയ്തുകൊണ്ടുള്ള ഹർജി പരിഗണിക്കവെയായിരുന്നു ഡിവിഷൻ ബെഞ്ച് ഇക്കാര്യം വ്യക്തമാക്കിയത്.
തൃപ്പൂണിത്തുഹ സ്വദേശികളായ ദിലീപ് മേനോൻ, ഗംഗ വിജയൻ എന്നിവരാണ് ഹർജി നൽകിയത്. ജസ്റ്റിസ് അനിൽ കെ നരേന്ദ്രൻ, ജസ്റ്റിസ് പിജി അജിത്ത് കുമാർ എന്നിവരാണ് ഹർജി പരിഗണിച്ചത്. ഹർജിയിൽ കോടതി സർക്കാരിന്റെയും ദേവസ്വത്തിന്റെയും വിശദീകരണം തേടി.
ക്ഷേത്രവുമായി ബന്ധമില്ലാത്ത സിനിമകളും വീഡിയോകളും ക്ഷേത്രങ്ങൾക്കുള്ളിൽ ചിത്രീകരിക്കാൻ അനുവദിക്കരുതെന്നായിരുന്നു ഹർജിയിലെ ആവശ്യം. അടുത്തിടെ തൃപ്പൂണിത്തുറ ക്ഷേത്രത്തിൽ വിശേഷം എന്ന സിനിമയുടെ ഷൂട്ടിംഗ് നടന്നിരുന്നു. ക്ഷേത്രത്തിലെ പവിത്രമായ പൂജകൾക്കും ആചാരങ്ങൾക്കും വിലകൽപ്പിക്കാതെ, വിശ്വാസികളുടെ വികാരം വൃണപ്പെടുത്തുന്ന രീതിയിലായിരുന്നു സിനിമയുടെ ചിത്രീകരണം നടന്നതെന്നും ഹർജിയിൽ വ്യക്തമാക്കി. ഹർജിക്കാർക്കായി അഡ്വ. ടി സഞ്ജയ് ഹാജരായി.
