ന്യൂഡല്ഹി: ആര്ട്ടിഫിഷ്യല് ഇന്റലിജന്സിന്റെ സഹായത്തോടെ വ്യാജരേഖകള് ഉപയോഗിച്ച് എടുത്ത മൊബൈല് കണക്ഷനുകള്ക്കും സ്പാം കോളുകള്ക്കുമെതിരെ വ്യാപക നടപടിയെടുത്ത് കേന്ദ്രസര്ക്കാര്. 1.77 കോടി മൊബൈല് കണക്ഷനുകള് വിഛേദിച്ചുവെന്ന് കേന്ദ്രസര്ക്കാര് വ്യക്തമാക്കി.നാല് ടെലികോം സേവനദാതാക്കള് ടെലികമ്യൂണിക്കേഷന് വകുപ്പുമായി ചേര്ന്ന് പ്രവര്ത്തിച്ചതിന് പിന്നാലെ 45 ലക്ഷം സ്പാം അന്താരാഷ്ട്ര കോളുകള് ഇന്ത്യന് ടെലികോം നെറ്റ്വര്ക്കിലേക്ക് എത്തുന്നത് തടയാനും കഴിഞ്ഞു.
സ്പാം കോളുകള് സബ്സ്ക്രൈബേഴ്സില് എത്തുന്നതിന് മുമ്പ് അവയെ തിരിച്ചറിയാനും തടയാനുമായി കേന്ദ്ര ടെലികോം മന്ത്രാലയം നൂതന സംവിധാനം അവതരിപ്പിച്ചിട്ടുണ്ട്. ഇത്തരം കബളിപ്പിക്കല് കോളുകള് ഇല്ലാതാക്കുന്ന ഒരു കേന്ദ്രീകൃത സംവിധാനം ഉടനെത്തുമെന്നും ടെലികോം മന്ത്രാലയം അറിയിച്ചു.
സൈബര് കുറ്റവാളികളുടെ 33.48 ലക്ഷം മൊബൈല് കണക്ഷനുകള് കേന്ദ്രം റദ്ദാക്കി. 49,930 മൊബൈല് ഹാന്ഡ്സെറ്റുകളും മന്ത്രാലയം ബ്ലോക്ക് ചെയ്തു. വ്യക്തിഗത ഉപയോഗപരിധയ്ക്ക് ലംഘനമേര്പ്പെടുത്തിയതിന്് 77.61 ലക്ഷം മൊബൈല് കണക്ഷനുകള് റദ്ദാക്കി. കൂടാതെ സൈബര് കുറ്റകൃത്യങ്ങളുമായി ബന്ധപ്പെട്ട് 2.29 ലക്ഷം കണക്ഷനുകളും റദ്ദാക്കിയവയില്പ്പെടുന്നു.
ഏകദേശം 71000 സിം ഏജന്റുമാരെ ടെലികോം മന്ത്രാലയം കരിമ്പട്ടികയില് ഉള്പ്പെടുത്തിയിട്ടുണ്ട്. വിവിധ സംസ്ഥാനങ്ങളിലും കേന്ദ്രഭരണപ്രദേശങ്ങളിലുമായി 365 എഫ്ഐആറുകള് ഇത്തരത്തില് രജിസ്റ്റര് ചെയ്തിട്ടുണ്ടെന്നും കേന്ദ്രസര്ക്കാര് വ്യക്തമാക്കി.
