കൊച്ചിയില് ഗുണ്ടാനേതാവ് ഓം പ്രകാശുമായി ബന്ധപ്പെട്ട ലഹരിക്കേസില് നടി പ്രയാഗ മാര്ട്ടിനെ ചോദ്യം ചെയ്ത് വിട്ടയച്ചു. എന്നാല് തനിക്ക് ഓം പ്രകാശിനെക്കുറിച്ച് ഒന്നും അറിയില്ലെന്നും വാര്ത്ത വന്നതിന് ശേഷം ഗൂഗിള് ചെയ്താണ് ആരാണ് ഓം പ്രകാശ് എന്ന് മനസ്സിലാക്കിയതെന്നും ചോദ്യം ചെയ്യലിന് ശേഷം പ്രയാഗ പ്രതികരിച്ചു. പോലീസിന്റെ ചോദ്യം ചെയ്യല് സ്വാഭാവികമാണ്. സുഹൃത്തിനെ കാണാനാണ് ഹോട്ടലില് ചെന്നതെന്നും പ്രയാഗ പറഞ്ഞു.
‘സുഹൃത്തുക്കളെ കാണാനാണ് പോയത്. ലഹരിപ്പാര്ട്ടി നടക്കുന്നത് എനിക്കറിയില്ലായിരുന്നു. ഇനി ചോദ്യം ചെയ്യലിന് ഹാജരാകാന് പോലീസ് പറഞ്ഞിട്ടില്ല. വാര്ത്ത വന്നതിന് ശേഷം ഗൂഗിള് ചെയ്താണ് ആരാണ് ഓം പ്രകാശ് എന്ന് മനസ്സിലാക്കിയത്. പലരേയും കാണുന്നതും പല സ്ഥലങ്ങളില് പോകുന്നതും സാമൂഹ്യ ജീവിതത്തിന്റെ ഭാഗമാണ്.
അവിടെ ക്രിമിനല്സുണ്ടോ അവരുടെ പശ്ചാത്തലം എന്തെന്നും നോക്കിയല്ല പോകുന്നത്. ഞാന് പോയ സ്ഥലത്ത് ഇങ്ങനെ ഒരാള് ഉണ്ടെന്നാണ് പറയപ്പെടുന്നത്. ഇങ്ങനെ ഒരാളെ കണ്ടതായി എനിക്ക് ഓര്മയില്ല.’ പ്രയാഗ പറഞ്ഞു.
അതേസമയം, പഞ്ചനക്ഷത്രഹോട്ടലില് ഗുണ്ടാനേതാവ് സംഘടിപ്പിച്ചത് ലഹരിപാര്ട്ടിയെന്നാണ് നിഗമനം. ശ്രീനാഥും പ്രയാഗയും ഓംപ്രകാശിന്റെ മുറിയില് മണിക്കൂറുകളോളം ചെലവഴിച്ചിരുന്നുവെന്നാണ് വിവരം. കേസിന്റെ എല്ലാവശങ്ങളും പരിശോധിക്കുമെന്ന് കമ്മീഷണര് പുട്ടവിമലാദിത്യ പറഞ്ഞു.
Discussion about this post