ലഖ്നൗ: പണം നല്‍കാത്തത് കൊണ്ട് പോസ്റ്റുമാന്‍ പാസ്‌പോര്‍ട്ട് കീറിയെന്ന് പരാതി. പാസ്‌പോര്‍ട്ടുമായെത്തിയ ഇദ്ദേഹം 500 രൂപ ചോദിച്ചെന്നും നല്‍കാത്തതിനാല്‍ ബാര്‍ കോഡുള്ള പേജ് കീറിയെന്നും പരാതി. തുടര്‍ന്ന് പരാതിക്കാരനും സുഹൃത്തുക്കളും പോസ്റ്റ് ഓഫീസിലെത്തി ഇക്കാര്യം ചോദിക്കുന്ന വീഡിയോ സോഷ്യല്‍ മീഡിയയില്‍ വൈറലായി.
ഉത്തര്‍പ്രദേശിലെ ലഖ്നൗവിലെ മലിഹാബാദിലാണ് ഈ സംഭവം. രവീന്ദ്ര ഗുപ്ത എന്ന പോസ്റ്റുമാനെതിരെ സുശീല്‍ എന്നയാളാണ് പൊലീസില്‍ പരാതി നല്‍കിയത്. പണം നല്‍കിയില്ലെങ്കില്‍ പാസ്‌പോര്‍ട്ട് തരില്ലെന്ന് പോസ്റ്റുമാന്‍ ഭീഷണിപ്പെടുത്തിയെന്ന് സുശീലിന്റെ പരാതിയില്‍ പറയുന്നു.
ഇദ്ദേഹം ചോദിച്ച പണം നല്‍കാതെ വന്നപ്പോള്‍ ബാര്‍ കോഡുള്ള പേജ് കീറിയെന്നും യുവാവ് പറഞ്ഞു. സര്‍ക്കാര്‍ ശമ്പളം തരുന്നുണ്ടല്ലോ, പിന്നെയെന്തിന് പാവപ്പെട്ട ജനങ്ങളെ പിഴിയുന്നുവെന്ന് പോസ്റ്റ് ഓഫീസില്‍ പ്രതിഷേധവുമായി എത്തിയവര്‍ ചോദിക്കുന്നത് വീഡിയോയില്‍ കാണാം.
ഉത്തര്‍പ്രദേശ് മുഖ്യമന്ത്രി, യുപി പൊലീസ്, തപാല്‍ വിഭാഗം തുടങ്ങിയ പേജുകളെ ടാഗ് ചെയ്താണ് ഈ വീഡിയോ സോഷ്യല്‍ മീഡിയയില്‍ പങ്കുവെച്ചിരിക്കുന്നത്. ഇത്തരത്തില്‍ പാസ്‌പോര്‍ട്ട് കൈമാറാന്‍ തങ്ങളോടും പോസ്റ്റുമാന്‍ പണം ചോദിച്ച് വാങ്ങിയെന്ന് വീഡിയോയ്ക്ക് താഴെ പലരും കമന്റ് ചെയ്തിട്ടുണ്ട്.
