പല്ലികൾ ഇല്ലാത്ത വീടുകൾ വളരെ ചുരുക്കം ആയിരിക്കും. വീടിന്റെ ചുവരുകളും അടുക്കളയിലെ അലമാരയുമെല്ലാം ആണ് പല്ലികളുടെ പ്രധാന വാസ കേന്ദ്രം. പലചരക്ക് സാധനങ്ങൾ സൂക്ഷിക്കുന്ന ഭാഗങ്ങളും പല്ലികളുടെ ഇഷ്ടകേന്ദ്രങ്ങളാണ്. ഇവയ്ക്ക് തുണയായി പാറ്റകളും ഉണ്ടാകും.
മനുഷ്യരെ പല്ലികൾ നേരിട്ട് ഉപദ്രവിക്കാറില്ല. പക്ഷെ മനുഷ്യർക്ക് യഥാർത്ഥത്തിൽ ഉപദ്രവകാരികൾ ആണ് പല്ലികൾ. അടുക്കളയിൽ ആണ് പല്ലികൾ കൂടുതലായി കാണപ്പെടാറുള്ളതെന്ന് നേരത്തെ പറഞ്ഞു. ഇതാണ് നമുക്ക് പ്രശ്നമാകുന്നത്.
ഭക്ഷണ സാധനങ്ങളിൽ ഇവ തലയിടാനും വീഴാനും മൂത്രമൊഴിക്കാനുമെല്ലാമുള്ള സാദ്ധ്യത വളരെ കൂടുതൽ ആണ്. ഇവ നമ്മുടെ ശരീരത്തിനുള്ളിൽ ചെന്നാൽ നമുക്ക് ഗുരുതരമായ ആരോഗ്യപ്രശ്നങ്ങൾ ഉണ്ടാക്കും. ഇതിന് പുറമേ ചിലപ്പോഴെല്ലാം പല്ലികൾ ഭക്ഷ്യവസ്തുക്കളുടെ പാക്കറ്റുകൾ കടിച്ച് മുറിക്കാറുണ്ട്. വസ്ത്രങ്ങളും ഇവ കടിച്ച് മുറിച്ച് കേടുവരുത്താറുണ്ട്. അതുകൊണ്ട് തന്നെ പല്ലികളെ വീട്ടിൽ നിന്നും അകറ്റി നിർത്തണം.
പല്ലികളെ വീട്ടിൽ നിന്നും തുരത്തിയോടിക്കാൻ നമുക്ക് കുരുമുളകിന്റെ ഇല ഉപയോഗിക്കാം. ഒരില തന്നെ പല്ലികളെ ഓടിയ്ക്കാൻ ധാരാളം ആണ്. ആദ്യം കുരുമുളകിന്റെ ഇല ഇടികല്ലിൽ വച്ച് നന്നായി ചതച്ച് എടുക്കുക. ശേഷം ഒരു കപ്പ് വെള്ളം തിളപ്പിച്ച് ഈ ഇലകൾ അതിലേക്ക് ഇടുക. ശേഷം നന്നായി ഇളക്കുക. ഇതിന് ശേഷം വീണ്ടും തിളപ്പിയ്ക്കുക. ഇലയുടെ നിറം മങ്ങുമ്പോൾ തീ ഓഫ് ചെയ്യാം. ശേഷം ഒരു ചന്ദന തിരിയുടെ കൂടോ ഒരു കഷ്ണം ചന്ദനത്തിരിയോ പൊട്ടിച്ച് ഇടുക. ഈ മിശ്രിതം തണുത്ത ശേഷം സ്േ്രപ ബോട്ടിലിൽ ആക്കി പല്ലിയുള്ള സ്ഥലങ്ങളിൽ തളിച്ചുകൊടുക്കാം.
Discussion about this post