വയനാട്: സഹോദരി പ്രിയങ്ക വാദ്രയെ വയനാട്ടിലെ ജയനങ്ങളെ ഏൽപ്പിക്കുകയാണെന്ന് രാഹുൽ ഗാന്ധി. രാജ്യത്ത് തന്നെ പാർലമെന്റിൽ രണ്ട് ജനപ്രതിനിധികളുണ്ടാകുന്ന ഒരേയൊരു സ്ഥലമായിരിക്കും വയനാടെന്നും അദ്ദേഹം പറഞ്ഞു. അനൗദികമായി താനെപ്പോഴും വയനാടിനോടൊപ്പം ഉണ്ടാകുമെന്നും രാഹുൽ ഗാന്ധി കൂട്ടിച്ചേർത്തു.
‘പ്രിയങ്കയെ വയനാട്ടുകാർ കൂടെ നിർത്തുമെന്ന് ഉറപ്പാണ്. എനിക്ക് നൽകിയ സ്‌നേഹം തന്റെ സഹോദരിക്കും നൽകണം. നിങ്ങൾ വയനാട്ടുകാരെ ഞാൻ എന്റെ സഹോദരിയെ ഏൽപ്പിക്കുകയാണ്. എന്റെ കയ്യിലുള്ള രാഖി പ്രിയങ്ക കെട്ടിയതാണ്. പൊട്ടുന്നത് വരെ ഇത് ഞാൻ അഴിച്ചുമാറ്റില്ല. അതുപോലെ അറ്റുപോവാത്ത ബന്ധം പോലെ സഹോദരിയെ വയനാട്ടിലെ പ്രിയപ്പെട്ടവർ നോക്കുമെന്ന് എനിക്ക് ഉറപ്പാണ്. വയനാട്ടുകാർ എന്റെയും സഹോദരിയുടെയും കൂടെയുണ്ടാകുമെന്ന് തന്നെയാണ് പ്രതീക്ഷ’ രാഹുൽ ഗാന്ധി പറഞ്ഞു.
ഇന്ന് ഉച്ചയോടെയാണ് വയനാട് ഉപതിരഞ്ഞെടുപ്പിൽ മത്സരിക്കാനായി പ്രിയങ്ക വാദ്ര നാമനിർദേശപത്രിക സമർപ്പിച്ചത്. മൂന്ന് സെറ്റ് പത്രികയാണ് പ്രിയങ്ക വാദ്ര സമർപ്പിച്ചത്. സോണിയാ ഗാന്ധി, രാഹുൽ ഗാന്ധി, ഭർത്താവ് റോബർട്ട് വാദ്ര, മകൻ എന്നിവരും പ്രിയങ്കയോടൊപ്പം പത്രികസമർപ്പണത്തിന് കൂടെയുണ്ടായിരുന്നു. കോൺഗ്രസ് അദ്ധ്യക്ഷൻ മല്ലികാർജുന ഖാർഖെയും എഐസിസി ജനറൽ സെക്രട്ടറി കെസി വേണുഗോപാലും പ്രിയങ്കയുടെ പത്രിക സമർപ്പണത്തിന് കളക്ടറേറ്റിൽ എത്തിയിരുന്നു.
ലോക്‌സഭാ തിരഞ്ഞെടുപ്പിൽ രണ്ട് മണ്ഡലത്തിൽ നിന്നും വിജയിച്ച രാഹുൽ ഗാന്ധി വയനാട് ഒഴിഞ്ഞതോടെയാണ് സഹോദരി പ്രിയങ്ക വാദ്രക്ക് നറുക്ക് വീണത്. മുതിർന്ന കോൺഗ്രസ് നേതാക്കളിൽ പലരും ഉണ്ടായിരുന്നിട്ടും പ്രിയങ്കയെ വയനാട്ടിൽ നിർത്തിയതിൽ വിമർശനവും ഉയരുന്നുണ്ട്.
Discussion about this post