തിരുവനന്തപുരം: സംസ്ഥാനത്ത് മഴയ്ക്ക് നേരിയ ശമനം. മഴ സാദ്ധ്യതയെ തുടർന്ന് പുറപ്പെടുവിച്ച മുന്നറിയിപ്പുകൾ പിൻവിലിച്ചു. നിലവിൽ സംസ്ഥാനത്തെ ഒരു ജില്ലയിലും മുന്നറിയിപ്പ് ഇല്ല. അതേസമയം വ്യാപകമായി മഴ ലഭിക്കുമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.
ഇന്നും നാളെയുമാണ് മഴ മുന്നറിയിപ്പ് ഇല്ലാത്തത്. ബുധനാഴ്ച തൊട്ട് മഴ വീണ്ടും കനക്കും. അതിനാൽ ബുധനാഴ്ച അഞ്ച് ജില്ലകളിൽ യെല്ലോ അലർട്ടാണ്. വ്യാഴാഴ്ചയോടെ മഴ കൂടുതൽ ശക്തമാകും. അതിനാൽ ആറ് ജില്ലകളിൽ യെല്ലോ അലർട്ട് ഏർപ്പെടുത്തിയിട്ടുണ്ട്. മഴ മുന്നറിയിപ്പ് ഇല്ലെങ്കിലും ജാഗ്രത പാലിക്കണം എന്നാണ് കാലാവസ്ഥാ നിരീക്ഷണ കേന്ദ്രം അറിയിക്കുന്നത്. മഴയ്ക്ക് ശക്തിയില്ലെങ്കിലും താരതമ്യേന ശക്തമായ കാറ്റും ഇടിമിന്നലുമാകും അനുഭവപ്പെടുക. ഈ സാഹചര്യത്തിലാണ് ജാഗ്രതാ നിർദ്ദേശം നൽകിയിരിക്കുന്നത്.
അതേസമയം കഴിഞ്ഞ ദിവസങ്ങളിൽ സംസ്ഥാനത്ത് അതിശക്തമായ മഴയാണ് ലഭിച്ചത്. ശക്തമായ മഴയെയും കാറ്റിനെയും തുടർന്ന് വ്യാപക നാശനഷ്ടങ്ങളും ഉണ്ടായിരുന്നു. ഇന്നലെയും ഇന്നുമായിട്ടാണ് മഴയ്ക്ക് നേരിയ ശമനം ഉണ്ടായിട്ടുള്ളത്.
