ന്യൂഡല്‍ഹി: മദ്യം വാങ്ങുന്നവരുടെ പ്രായം പരിശോധിക്കാൻ പ്രോട്ടോകോൾ രൂപവത്കരിക്കണമെന്ന ഹർജിയിൽ കേന്ദ്രത്തിന് നോട്ടീസ് അയച്ച് സുപ്രീം കോടതി.bരാജ്യത്തെ മദ്യഷോപ്പുകൾ, ബാറുകൾ, പബുകൾ എന്നിവിടങ്ങളിൽ നിന്ന് മദ്യം വാങ്ങുന്ന വ്യക്തികളുടെ പ്രായം പരിശോധിക്കാൻ പ്രോട്ടോകോൾ രൂപവത്കരിക്കണമെന്നതാണ് ഹർജിയിലെ ആവശ്യം. ‘കമ്യൂണിറ്റി എഗൻസ്റ്റ് ഡ്രങ്കൻ ഡ്രൈവിങ്’ എന്ന സന്നദ്ധ സംഘടനയാണ് ഇത് സംബന്ധിച്ച് ഹര്‍ജി നല്‍കിയത്.
വിവിധ സംസ്ഥാനങ്ങളിൽ വ്യത്യസ്ത പ്രായപരിധി ആയതിനാൽ തന്നെ പ്രായം സംബന്ധിച്ചുള്ള പരിശോധനകള്‍ ഒന്നും ഇല്ലാതെയാണ് മദ്യശാലകള്‍ മദ്യം വില്‍ക്കുന്നത്. ഇത് തടയിടാനുള്ള നിയമം പ്രാബല്യത്തില്‍ വരണമെന്നതാണ് ഹര്‍ജിയിലെ ആവശ്യം. സർക്കാർ അംഗീകൃത തിരിച്ചറിയൽ കാർഡുകൾ പരിശോധിച്ച് പ്രായം ഉറപ്പ് വരുത്തിയ ശേഷം മാത്രമേ മദ്യശാലകളിൽ നിന്നും മദ്യം നൽകാവൂ എന്ന് ഹര്‍ജിയില്‍ ആവശ്യപ്പെടുന്നു.
ഇത് സംബന്ധിച്ച് സർക്കാർ നയം രൂപീകരിച്ചാൽ മദ്യപിച്ച് വാഹനമോടിക്കുന്നത് കുറയ്ക്കുന്നതിനും പ്രായപൂർത്തിയാകാത്തവരുടെ മദ്യപാനം തടയുന്നതിലും കാര്യമായ പങ്ക് വഹിക്കുമെന്നും അഭിഭാഷകർ കോടതിയിൽ വ്യക്തമാക്കി.
കേരളത്തിൽ മദ്യശാലകളിൽ നിന്നും മദ്യം വാങ്ങുന്നതിനുള്ള കുറഞ്ഞ പ്രായം 23 വയസ്സ് ആണ്. എന്നാൽ ഗോവ, കർണാടക, തമിഴ്നാട് എന്നീ സംസ്ഥാനങ്ങളിൽ 18 വയസ് കഴിഞ്ഞാൽ മദ്യം വാങ്ങാന്‍ കഴിയും. ഡല്‍ഹി, മഹാരാഷ്ട്ര തുടങ്ങിയ സംസ്ഥാനങ്ങളിൽ 25 വയസ് കഴിഞ്ഞാല്‍ മദ്യം വാങ്ങാം. ഈ വ്യത്യാസം തന്നെയാണ് പ്രായം സംബന്ധിച്ച് ഒരു മദ്യശാലയിലും പരിശോധനകള്‍ നടത്താറില്ല. വിദേശ രാജ്യങ്ങളിൽ കുട്ടികൾക്ക് മദ്യം നൽകുന്നത് ശിക്ഷാർഹമാണ്. ഇത്തരത്തില്‍ തന്നെ ഇന്ത്യയിലും നിയമം വരണം എന്ന് ഹർജിയില്‍ കമ്യൂണിറ്റി എഗൻസ്റ്റ് ഡ്രങ്കൻ ഡ്രൈവിങ്’ വ്യക്തമാക്കി.
ജസ്റ്റിസുമാരായ ബി.ആർ. ഗവായ്, കെ.വി. വിശ്വനാഥൻ എന്നിവർ അടങ്ങിയ ബെഞ്ച് ആണ് ഹർജി പരിഗണിച്ചത്.
