സ്പാംകോളുകളും സന്ദേശങ്ങളും പെരുകുന്ന സാഹചര്യത്തില് കടുത്ത നടപടിയുമായി ട്രായ് (ടെലികോം റെഗുലേറ്ററി അതോറിറ്റി ഓഫ് ഇന്ത്യ). വ്യക്തിഗത നമ്പറുകളില്നിന്ന് ടെലിമാര്ക്കറ്റിങ്ങുകാര് സ്പാം കോളുകള് വിളിക്കുകയും സന്ദേശം അയക്കുകയും ചെയ്യുന്നപക്ഷം ആ നമ്പറുകള് ഡിസ്കണക്ട് ചെയ്യുമെന്ന് ട്രായ് അറിയിച്ചു. എന്.ഡി.ടി.വി. പ്രൊഫിറ്റിന് നല്കിയ അഭിമുഖത്തിലാണ് ട്രായ് ചെയര്മാന് അനില് കുമാര് ലഹോതി ഇത് വ്യക്തമാക്കിയത്.
അതേസമയം, സ്പാം കോളുകളും സന്ദേശങ്ങളും അയക്കുന്ന നമ്പറുകളുമായി ബന്ധപ്പെട്ട സ്ഥാപനങ്ങളെ കരിമ്പട്ടികയില് ഉള്പ്പെടുത്തുമെന്നും ചെയര്മാന് വ്യക്തമാക്കിയിട്ടുണ്ട്. ഇതിനകം 18 ലക്ഷം നമ്പറുകള് ഡിസ്കണക്ട് ചെയ്തുകഴിഞ്ഞു. 800 സ്ഥാപനങ്ങളെ കരിമ്പട്ടികയിലും ഉള്പ്പെടുത്തി.
സംവിധാനം എങ്ങനെയാണ് തട്ടിപ്പുകാര് ദുരുപയോഗം ചെയ്യുന്നതെന്ന് മനസ്സിലാക്കാന് ട്രായ് വിശദമായ പഠനം നടത്തിയിട്ടുണ്ട്. സ്പാം സന്ദേശങ്ങളെ പ്രതിരോധിക്കുന്നതിന്റെ ആദ്യഘട്ടം എന്ന നിലയ്ക്ക്, ഉപയോഗത്തിലില്ലാത്ത കണ്ടന്റ് ടെംപ്ലേറ്റുകളും ഹെഡറുകളും നീക്കം ചെയ്യാന് സേവനദാതാക്കളോട് ആവശ്യപ്പെട്ടിട്ടുണ്ടെന്നും ട്രായ് ചെയര്മാന് പറഞ്ഞു.
വാണിജ്യാവശ്യങ്ങള്ക്കായുള്ള വിളികള്ക്ക് ഉപയോഗിക്കുന്ന നമ്പറുകള് 140 സീരീസില് ഉള്പ്പെട്ടതായിരിക്കണമെന്നത് ട്രായ് നിര്ബന്ധമാക്കിയിട്ടുണ്ട്. ഡു നോട്ട് ഡയല് (ഡി.എന്.ഡി.) രജിസ്ട്രിയില് പേര് ചേര്ത്തിട്ടുള്ളവര്ക്ക് വാണിജ്യ കോളുകള് വരികയുമില്ല.
