ജവഹർലാൽ നെഹ്റു യൂണിവേഴ്സിറ്റിയിലെ (ജെ.എൻ.യു) അധ്യാപകനായിരിക്കെ വിദ്യാർത്ഥിനികളെ ലൈംഗികമായി അധിക്ഷേപിച്ചെന്ന കേസിൽ കോൺഗ്രസ് ലോക്സഭാ എം.പിയും മുൻ പ്രൊഫസറുമായ അങ്കോംച ബിമൽ അകോയിജത്തിന് ചോദ്യം ചെയ്യലിന് ഹാജരാകാൻ ഡൽഹി പൊലീസ് സമൻസ് അയച്ചു. വസന്ത് കുഞ്ച് നോർത്ത് പൊലീസ് സ്റ്റേഷനിലെ ഉദ്യോഗസ്ഥർ ചോദ്യം ചെയ്യലിന് ഹാജരാകാൻ നിർദ്ദേശിച്ച് ഇദ്ദേഹത്തിന്റെ വസതിക്ക് മുന്നിൽ നോട്ടീസ് പതിക്കുകയായിരുന്നു. ഭാരതീയ നാഗരിക് സുരക്ഷാ സംഹിതയിലെ (ബി.എൻ.എസ്.എസ്) നിർദ്ദിഷ്ട വകുപ്പുകൾ പ്രകാരമാണ് അന്വേഷണത്തിൽ പങ്കുചേരാൻ പൊലീസിന്റെ നിർദ്ദേശം.
ജെ.എൻ.യുവിലെ പതിനൊന്നോളം വിദ്യാർത്ഥിനികൾ നൽകിയ പരാതികളുടെ അടിസ്ഥാനത്തിലാണ് എം.പിക്കെതിരെ പൊലീസ് എഫ്.ഐ.ആർ രജിസ്റ്റർ ചെയ്ത് അന്വേഷണം ആരംഭിച്ചത്. പഠനപരമായ ആവശ്യങ്ങൾക്കെന്ന വ്യാജേന കാമ്പസിലെ വസതിയിലേക്ക് വിളിച്ചുവരുത്തി ലൈംഗികമായി അതിക്രമിക്കാൻ ശ്രമിച്ചുവെന്നും ക്ലാസ് മുറികളിൽ അശ്ലീല പരാമർശങ്ങൾ നടത്തിയെന്നുമാണ് വിദ്യാർത്ഥിനികളുടെ പരാതി. യൂണിവേഴ്സിറ്റിയുടെ ആഭ്യന്തര സമിതി നടത്തിയ അന്വേഷണത്തിൽ കുറ്റക്കാരനാണെന്ന് കണ്ടെത്തിയതിനെ തുടർന്ന് കഴിഞ്ഞ ദിവസം ഇദ്ദേഹത്തെ ജെ.എൻ.യു സേവനത്തിൽ നിന്ന് പുറത്താക്കിയിരുന്നു.
അതേസമയം, തനിക്കെതിരെയുള്ള ആരോപണങ്ങളെല്ലാം കോൺഗ്രസ് എം.പി നിഷേധിക്കുകയും വിഷയത്തിൽ രാഷ്ട്രീയ ഗൂഢാലോചനയുണ്ടെന്ന് ആരോപിക്കുകയും ചെയ്തു. കേസിനെ ചൊല്ലി രാഷ്ട്രീയ അങ്കവും ശക്തമായിട്ടുണ്ട്. കോൺഗ്രസും രാഹുൽ ഗാന്ധിയും വിഷയത്തിൽ മൗനം പാലിക്കുകയാണെന്ന് ബി.ജെ.പി കുറ്റപ്പെടുത്തി. എം.പി സ്ഥാനത്ത് നിന്ന് ഇദ്ദേഹത്തെ രാജിവെപ്പിക്കണമെന്ന് ആവശ്യപ്പെട്ട് ബി.ജെ.പി മഹിളാ മോർച്ചയും വനിതാ എം.പിമാരുടെ സംഘവും രാഷ്ട്രപതി ദ്രൗപദി മുർമുവിന് നിവേദനം നൽകി.
