ഇസ്രായേലിലേക്കുള്ള വിമാനങ്ങളിൽ പാകിസ്താൻ സ്വദേശികളായ പൈലറ്റുമാർക്കും ക്യാബിൻ ക്രൂവിനും വിലക്കേർപ്പെടുത്തി എയർ ഫ്രാൻസ്. സെപ്റ്റംബർ 30-ന് ഫ്ലൈ ദുബായ് വിമാനത്തിൽ നടന്ന ഭീകരാക്രമണ ശ്രമത്തെത്തുടർന്ന് ഇസ്രായേൽ വ്യോമയാന നിയന്ത്രണങ്ങൾ കർശനമാക്കിയതോടെയാണ് ഈ നടപടി. പാകിസ്താൻ ഉൾപ്പെടെ ഇസ്രായേലുമായി നയതന്ത്രബന്ധമില്ലാത്ത 31 രാജ്യങ്ങളിലെ പൈലറ്റുമാർക്കും ജീവനക്കാർക്കുമാണ് ഫ്രഞ്ച് എയർലൈൻ വിമാന സർവീസുകളിൽ നിന്ന് വിലക്കേർപ്പെടുത്തിയത്.
ഇതിന് പിന്നാലെ അമേരിക്കൻ വിമാനക്കമ്പനിയായ യുണൈറ്റഡ് എയർലൈൻസും ഇസ്രായേലിലേക്കും തിരിഞ്ഞുമുള്ള സർവീസുകളിൽ സമാനമായ നിയന്ത്രണങ്ങൾ ഏർപ്പെടുത്താൻ ജീവനക്കാർക്ക് നിർദ്ദേശം നൽകിയിട്ടുണ്ട്. ഒമാൻ സ്വദേശിയായ കോ-പൈലറ്റ് വിമാനത്തിൽ ഭീകരാക്രമണത്തിന് ശ്രമിച്ച സംഭവത്തിന് ശേഷമാണ് ഇസ്രായേലുമായി നയതന്ത്ര ബന്ധമില്ലാത്ത രാജ്യങ്ങളിൽ നിന്നുള്ള വിമാന ജീവനക്കാർക്ക് ഇസ്രായേൽ കർശന നിയന്ത്രണം ഏർപ്പെടുത്തിയത്. ഇതിന്റെ അടിസ്ഥാനത്തിൽ പാകിസ്താൻ പൈലറ്റുമാർക്ക് വിലക്ക് സ്ഥിരീകരിക്കുന്ന ആദ്യ വിമാനക്കമ്പനിയാണ് എയർ ഫ്രാൻസ്.
പാകിസ്താൻ, അഫ്ഗാനിസ്ഥാൻ, ബംഗ്ലാദേശ്, ഖത്തർ, സൗദി അറേബ്യ, മലേഷ്യ, ഇന്തോനേഷ്യ ഉൾപ്പെടെയുള്ള 29 മുതൽ 31 ഓളം രാജ്യങ്ങളിലെ പൗരത്വമോ ഇരട്ട പൗരത്വമോ ഉള്ള ജീവനക്കാർക്ക് ഈ നിയന്ത്രണം ബാധകമാകുമെന്നാണ് റിപ്പോർട്ടുകൾ വ്യക്തമാക്കുന്നത്. അടുത്തിടെ ഇന്തോനേഷ്യൻ പൈലറ്റ് ഉൾപ്പെട്ട എത്യോപ്യൻ എയർലൈൻസ് വിമാനം യാത്രയ്ക്കിടയിൽ തിരികെ വിളിച്ച സംഭവം പുതിയ നിയമങ്ങൾ കൂടുതൽ കർശനമായി നടപ്പിലാക്കുന്നതിന്റെ തെളിവാണ്. ഇസ്രായേലിന്റെ പുതിയ വ്യോമയാന സുരക്ഷാ നിയമങ്ങൾ പാലിക്കുന്നതിനായി വരും ദിവസങ്ങളിൽ കൂടുതൽ അന്താരാഷ്ട്ര വിമാനക്കമ്പനികൾ സമാനമായ നിയന്ത്രണങ്ങൾ ഏർപ്പെടുത്തുമെന്നാണ് കരുതപ്പെടുന്നത്.
