ഒരു രാജ്യം ഒരു ഇലക്ഷൻ; വഖഫ് ബിൽ; രാജ്യത്തിന് തന്നെ നിർണ്ണായകമായ നീക്കങ്ങളുമായി പാർലമെന്റിന്റെ ശൈത്യ കാല സമ്മേളനം നാളെ തുടങ്ങും

ന്യൂഡൽഹി: രാജ്യത്തിൻറെ ഭാവിയെ തന്നെ മാറ്റിമറിക്കുന്ന നിർണ്ണായക തീരുമാനങ്ങളുമായി പാർലമെന്റിന്റെ ശൈത്യ കാല സമ്മേളനം നാളെ തുടങ്ങും. തിങ്കളാഴ്ച തുടങ്ങുന്ന പാർലമെൻ്റിൻ്റെ ശീതകാല സമ്മേളനത്തിൽ വഖഫ് നിയമം ഭേദഗതി ചെയ്യുന്നതുൾപ്പെടെ ഏറ്റവും ചുരുങ്ങിയത് 16 ബില്ലുകളെങ്കിലും നരേന്ദ്ര മോദി സർക്കാരിൻ്റെ അജണ്ടയിലുണ്ട്. ഡിസംബർ 20 വരെ നീളുന്ന സെഷനിൽ 19 സിറ്റിംഗുകളാണുള്ളത്.

2029-ൽ പാർലമെൻ്റിലേക്കും എല്ലാ സംസ്ഥാന അസംബ്ലികളിലേക്കും സമന്വയിപ്പിച്ച തെരഞ്ഞെടുപ്പുകളിലേക്ക് നയിക്കാൻ ഒരു രാജ്യം ഒരു ഇലക്ഷൻ ബില്ലും കേന്ദ്ര സർക്കാർ അവതരിപ്പിച്ചേക്കും
വഖഫ് (ഭേദഗതി) ബില്ലിന് പുറമെ പാർലമെൻ്റിൻ്റെ ഇരുസഭകളിലും അവതരിപ്പിക്കുന്നതിനും പാസാക്കുന്നതിനുമായി അഞ്ച് ബില്ലുകൾ പട്ടികപ്പെടുത്തിയിട്ടുണ്ട്. മർച്ചൻ്റ് ഷിപ്പിംഗ് ബിൽ, തീരദേശ ഷിപ്പിംഗ് ബിൽ, ഇന്ത്യൻ തുറമുഖ ബിൽ, പഞ്ചാബ് കോടതികൾ (ഭേദഗതി) ബിൽ, രാഷ്ട്രീയ സഹകാരി വിശ്വവിദ്യാലയ ബിൽ എന്നിവയാണ് പുതിയ അഞ്ച് ബില്ലുകൾ.