ടി20 ലോകകപ്പിൽ നമീബിയക്കെതിരായ മത്സരത്തിലൂടെ സഞ്ജു സാംസൺ തന്റെ ലോകകപ്പ് അരങ്ങേറ്റം കുറിച്ചെങ്കിലും, താരത്തിന്റെ പ്രകടനത്തെ വിലയിരുത്തി മുൻ ഇന്ത്യൻ സ്പിന്നർ ആർ. അശ്വിൻ. സഞ്ജു ഇപ്പോൾ റൺസ് കണ്ടെത്താൻ കുറച്ചധികം ബുദ്ധിമുട്ടുന്നതായി തോന്നുന്നുവെന്ന് അശ്വിൻ അഭിപ്രായപ്പെട്ടു.
ഡൽഹിയിലെ അരുൺ ജെയ്റ്റ്ലി സ്റ്റേഡിയത്തിൽ നടന്ന മത്സരത്തിൽ അഭിഷേക് ശർമ്മയ്ക്ക് പകരക്കാരനായാണ് സഞ്ജു പ്ലേയിംഗ് ഇലവനിൽ എത്തിയത്. മൂന്ന് സിക്സറുകളും ഒരു ഫോറുമടിച്ച് തകർപ്പൻ തുടക്കമാണ് സഞ്ജു നൽകിയതെങ്കിലും അത് നീണ്ടുനിന്നില്ല.
കഴിഞ്ഞ ഡിസംബറിൽ അന്താരാഷ്ട്ര ക്രിക്കറ്റിൽ നിന്ന് വിരമിച്ച അശ്വിൻ തന്റെ യൂട്യൂബ് ചാനലിലൂടെയാണ് നിലപാട് വ്യക്തമാക്കിയത്. “സഞ്ജു റൺസിനായി കുറച്ചധികം കഷ്ടപ്പെടുന്നുണ്ട്. നമീബിയക്കെതിരെ നല്ല രീതിയിൽ തുടങ്ങിയെങ്കിലും അത് വലിയൊരു സ്കോറിലേക്ക് മാറ്റാൻ അദ്ദേഹത്തിന് സാധിച്ചില്ല,” അശ്വിൻ പറഞ്ഞു.
എട്ട് പന്തിൽ 22 റൺസെടുത്ത് നിൽക്കെ നമീബിയൻ പേസർ ബെൻ ഷിക്കോംഗോയാണ് സഞ്ജുവിനെ പുറത്താക്കിയത്. പന്തിന്റെ വേഗത കുറച്ച് ഷിക്കോംഗോ എറിഞ്ഞ തന്ത്രപരമായ പന്തിൽ സഞ്ജു വീണുപോവുകയായിരുന്നു. ഡീപ് മിഡ് വിക്കറ്റിൽ ലോറൻ സ്റ്റീൻകാമ്പ് പിടിച്ച ലളിതമായ ക്യാച്ചിലൂടെ സഞ്ജുവിന്റെ ലോകകപ്പ് അരങ്ങേറ്റ ഇന്നിംഗ്സ് അവസാനിച്ചു.
ഫെബ്രുവരി 15-ന് കൊളംബോയിൽ നടക്കുന്ന പാകിസ്ഥാനെതിരായ നിർണ്ണായക മത്സരത്തിന് മുൻപായി അഭിഷേക് ശർമ്മ അസുഖത്തിൽ നിന്ന് മുക്തനായി തിരിച്ചെത്തുമെന്നാണ് ടീം മാനേജ്മെന്റ് പ്രതീക്ഷിക്കുന്നത്. അഭിഷേക് തിരിച്ചെത്തിയാൽ സഞ്ജു വീണ്ടും പുറത്തിരിക്കേണ്ടി വരുമെന്നും അശ്വിൻ സൂചിപ്പിച്ചു.
Discussion about this post