ഗുണനിലവാരമില്ലാത്ത ഉല്‍്പന്നം വില്‍ക്കുക എന്നത് കുറ്റകൃത്യമാണ്. ഇത്തരത്തില്‍ ഗുണ നിലവാരമില്ലാത്ത ഉത്പ്പന്നം വിതരണം ചെയ്‌തെതായി ആരോപിച്ച് ബംഗളൂരു ആസ്ഥാനമായുള്ള ഇ-കൊമേഴ്‌സ് കമ്പനിയായ ഫ്‌ലിപ്കാര്‍ട്ടിനും അതിന്റെ വില്‍പ്പനക്കാരനായ ഒരാള്‍ക്കുമെതിരെ യുവതി നല്‍കിയ പരാതിയില്‍ 10,000 രൂപ നഷ്ടപരിഹാരം നല്‍കാന്‍ ഉത്തരവിട്ടിരിക്കുകയാണ് മുംബൈയിലെ ഉപഭോക്തൃ കോടതി.
ഗോരേഗാവില്‍ താമസിക്കുന്ന തരുണ രജ്പുത് എന്ന യുവതി കഴിഞ്ഞ ഒക്ടോബര്‍ 9 നാണ് ഫ്‌ലിപ്കാര്‍ട്ടില്‍ നിന്ന് 4,641 രൂപയ്ക്ക് 13 കണ്ടെയ്‌നര്‍ ഹെര്‍ബലൈഫ് ന്യൂട്രീഷന്‍ ഫ്രഷ് എനര്‍ജി ഡ്രിങ്ക് മിക്‌സ് വാങ്ങിയത്. ഒക്ടോബര്‍ 14 ന് പാര്‍സല്‍ എത്തിയപ്പോള്‍ ഉല്‍പ്പന്നം ഗുണനിലവാരം കുറഞ്ഞതാണെന്ന് ബോധ്യപ്പെട്ടു.
പാര്‍സലായി എത്തിയ ഉല്‍പ്പന്നത്തില്‍ ക്യുആര്‍ കോഡ് ഉണ്ടായിരുന്നില്ല. നിറവും ഗുണവും യഥാര്‍ത്ഥ ഉത്പ്പന്നത്തിന്റേതുമായിരുന്നില്ല. ഇതോടെ തനിക്ക് ലഭിച്ചത് ഗുണനിലവാരമില്ലാത്തതാണെന്ന് യുവതിക്ക് മനസിലായി. പിന്നാലെ പാര്‍സല്‍ ഫ്‌ലിപ്കാര്‍ട്ടിനെ തിരിച്ചേല്‍പ്പിക്കാന്‍ യുവതി തയ്യാറായെങ്കിലും ഇവര്‍ ‘ നോ റിട്ടേണ്‍ പോളിസി’ ചൂണ്ടിക്കാട്ടി വിറ്റ സാധനം തിരിച്ചെടുക്കാന്‍ കഴിയില്ലെന്ന് അവകാശപ്പെട്ടു. യുവതി നിരവധി തവണ കസ്റ്റമര്‍ കെയറുമായി ബന്ധപ്പെട്ടെങ്കിലും തൃപ്തികരമായ പരിഹാരം ലഭിച്ചില്ല. പിന്നാലെയാണ് ഇവര്‍ ഉപഭോക്തൃ കോടതിയെ സമീപിച്ചത്.
കേസില്‍ വാദം കേട്ട കോടതി യുവതിയുടെ പരാതിയില്‍ കഴമ്പുണ്ടെന്നും ‘റിട്ടേണ്‍ പോളിസി എന്ന കാരണം ഉയര്‍ത്തി സാധനം തിരിച്ചെടുക്കാത്തത് അന്യായമായ വ്യാപാര സമ്പ്രദായം സ്വീകരിക്കുന്നതിന് തുല്യമാണെന്നും നിരീക്ഷിച്ചു. 50 ലക്ഷം രൂപ നഷ്ടപരിഹാരം നല്‍കണമെന്ന യുവതിയുടെ ആവശ്യം തള്ളിയ കോടതി 2023 ഒക്ടോബര്‍ 21 മുതല്‍ 9 ശതമാനം പലിശ സഹിതം 4,641 രൂപ തിരികെ നല്‍കാന്‍ ഫ്‌ലിപ്കാര്‍ട്ടിനോടും വില്‍പ്പനക്കാരനോടും ഉത്തരവിട്ടു. ഒപ്പം കോടതി ചെലവുകള്‍ കൂടിച്ചേര്‍ത്ത് 10,000 രൂപ നല്‍കാനും നിര്‍ദ്ദേശിച്ചു.
Discussion about this post