തിരുവനന്തപുരം: ഫിൻജാൽ ചുഴലിക്കാറ്റിന്റെ സ്വാധീന ഫലമായി സംസ്ഥാനത്ത് മഴ കനക്കുന്നു. വരും മണിക്കൂറുകളിൽ സംസ്ഥാനത്ത് അതിശക്തമായ മഴ ലഭിക്കുമെന്നാണ് കാലാവസ്ഥാ നിരീക്ഷണ കേന്ദ്രം അറിയിക്കുന്നത്. ഇതിന്റെ അടിസ്ഥാനത്തിൽ വിവിധ ജില്ലകളിൽ അലർട്ടുകൾ പ്രഖ്യാപിച്ചു.
സംസ്ഥാനത്ത് എല്ലാ ജില്ലകളിലും ഇന്ന് മഴ ലഭിക്കും. ഇതിൽ പത്തനംതിട്ട, ആലപ്പുഴ എന്നീ ജില്ലകളിലും, പാലക്കാട് മുതൽ കാസർകോട്‌വരെയുള്ള ജില്ലകളിലും യെല്ലോ അലർട്ടാണ്. കോട്ടയം, എറണാകുളം, ഇടുക്കി, തൃശ്ശൂർ എന്നീ ജില്ലകളിൽ മഴ കൂടുതൽ ശക്തമാകും. അതിനാൽ ഈ ജില്ലകളിൽ ഇന്ന് ഓറഞ്ച് അലർട്ടാണ്. ഇന്നലെ രാത്രി മുതൽ സംസ്ഥാനത്ത് അതിശക്തമായ മഴയാണ് ലഭിക്കുന്നത്.
നാളെയും വരുന്ന മൂന്ന് ദിവസവും സംസ്ഥാനത്ത് ഈ കാലാവസ്ഥ തുടരും. അതിനാൽ വരും ദിവസങ്ങളിലും മഴ മുന്നറിയിപ്പ് പുറപ്പെടുവിച്ചിട്ടുണ്ട്. നാളെ മഴ അൽപ്പം കൂടി കനക്കും. അതിനാൽ അഞ്ച് ജില്ലകളിൽ റെഡ് അലർട്ടുണ്ട്. മലപ്പുറം മുതൽ കണ്ണൂർവരെയുള്ള ജില്ലകളിലാണ് റെഡ് അലർട്ട്. കാസർകോടും പാലക്കാട് മുതൽ എറണാകുളം വരെയും ഓറഞ്ച് അലർട്ടാണ്. തിരുവനന്തപുരത്തും കൊല്ലത്തും മഴ മുന്നറിയിപ്പ് പ്രത്യേകമായി പുറപ്പെടുവിച്ചിട്ടില്ല. എങ്കിലും മഴ ലഭിക്കുമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി.
മഴയ്ക്ക് പുറമേ ശക്തമായ കാറ്റിനും ഇടിമിന്നലിനും സാദ്ധ്യതയുണ്ട്. അതിനാൽ ജാഗ്രത പാലിക്കണമെന്ന് സംസ്ഥാന ദുരന്തനിവാരണ അതോറിറ്റിയും അറിയിച്ചിട്ടുണ്ട്. തീരമേഖലയിൽ താമസിക്കുന്നവർക്കായി പ്രത്യേക ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്.
Discussion about this post