മഹാകുംഭമേളയ്ക്കായി ഒരുങ്ങി യുപി; പുതിയ ജില്ല പ്രഖ്യാപിച്ച് സർക്കാർ

ലക്‌നൗ; 2025 ലെ മഹാ കുംഭമേളയ്ക്കായി ഒരുങ്ങി ഉത്തർപ്രദേശ്. ഇതിന് മുന്നോടിയായി സർക്കാർ പുതിയ ജില്ലയും പ്രഖ്യാപിച്ചു. മഹാ കുംഭ് പ്രദേശത്തെയാണ് പുതിയ ജില്ലയായി പ്രഖ്യാപിച്ചിരിക്കുന്നത്. മഹാ കുംഭമേള ജില്ല എന്നാണ് ഈ പ്രദേശം ഇനി അറിയപ്പെടുക. മഹാകുംഭമേളയ്ക്ക് എത്തുന്ന ഭക്തർക്ക് സൗകര്യങ്ങൾ ഒരുക്കുന്നതിനും ഭരണപരമായ മികച്ച പ്രവർത്തനങ്ങൾ നടത്തുന്നതിനുമാണ് താത്ക്കാലികമായി യോഗി ആദിത്യനാഥ് സർക്കാർ ഈ ജില്ല രൂപീകരിച്ചിരിക്കുന്നത്.

നാല് തഹസിൽദാർ പ്രദേശങ്ങളിലെ 67 വില്ലേജുകൾ ബന്ധിപ്പിച്ചാണ് പുതിയ ജില്ല രൂപീകരിച്ചിരിക്കുന്നത്. ഈ താത്ക്കാലിക ജില്ലയിൽ ഭരണം സാധാരണ ജില്ലയിലേത് പോലെ തന്നെയാവും ശക്തമായ ക്രമസമാധാന പരിപാലനത്തിനായി പുതിയ ജില്ലയിൽ താത്കാലിക പോലീസ് സ്‌റ്റേഷനുകളും സൃഷ്ടിക്കും. ഭക്തർക്ക് മികച്ച സേവനം ഉറപ്പാക്കുകയാണ് ലക്ഷ്യമെന്ന് മുഖ്യമന്ത്രി യോഗി ആദിത്യനാഥ് പറഞ്ഞു. ജില്ലയിൽ മേള സമയത്തെ തയ്യാറെടുപ്പുകൾക്കും സേവനങ്ങൾക്കുമായി ഒരു അഡ്മിനിസ്ട്രേറ്റീവ് ടീം ഉണ്ടായിരിക്കും. 12 വർഷത്തിലൊരിക്കൽ സംഘടിപ്പിക്കുന്ന കുംഭമേള 2025 ജനുവരി 13 മുതൽ ഫെബ്രുവരി 26 വരെയാണ് നടക്കുന്നത്.