ജെഎന്‍യു വിഷയത്തില്‍ പ്രതിപക്ഷത്തിനെതിരെ ആഞ്ഞടിച്ച് കേന്ദ്ര ധനകാര്യമന്ത്രി അരുണ്‍ ജെയ്റ്റ്‌ലി. തീവ്രവാദത്തിനെതിരെ ശക്തമായ നിലപാട് എടുക്കുന്നതില്‍ വിട്ടുവീഴ്ചയില്ലെന്ന് വ്യക്തമാക്കിയ അരുണ്‍ ജെയ്റ്റ്‌ലി ഇന്ത്യയുടെ ഹൃദയഭൂമിയില്‍ ഇന്ത്യ വിരുദ്ധ മുദ്രാവാക്യങ്ങള്‍ ഉയരുമ്പോള്‍ നിശബ്ദത പാലിക്കണമെന്ന് പറയുന്നത് അംഗീകരിക്കാനാവില്ലെന്ന് വ്യക്തമാക്കി. പോലിസ് നടപടി എടുക്കാതെ രാജ്യവിരുദ്ധ മുദ്രാവാക്യം ഉയരുന്നത് കേട്ട് നില്‍ക്കണമെന്നാണോ നിങ്ങള്‍ പറയുന്നതെന്നും ജയ്റ്റലി ചോദിച്ചു.
തീവ്രവാദത്തിനെതിരെ ഞങ്ങളേക്കാള്‍ ഉശിരോടെ സംസാരിക്കണ്ടവരാണ് കോണ്‍ഗ്രസുകാര്‍. കാരണം നിങ്ങളുടെ രണ്ട് പ്രധാനമന്ത്രിമാര്‍ തീവ്രവാദികളാല്‍ വധിക്കപ്പട്ടതാണ്. ഈ രാജ്യത്തെ വിഭജിക്കുന്നവര്‍ക്ക് എടുത്ത് ചാടി ബഹുമാനം കൊടുക്കരുതെന്നും ജയ്റ്റലി പറഞ്ഞു.
ജെ.എന്‍.യു ഇന്ത്യയുടെ ഭാഗവും ഇന്ത്യന്‍ നിയമങ്ങള്‍ ബാധകമായ സ്ഥലവുമാണ്. അവിടെ പീനല്‍ കോഡ് ലംഘിക്കപ്പെട്ടാല്‍ പോലീസിന് പ്രവേശിക്കാന്‍ അധികാരമുണ്ടെന്നും അദ്ദേഹം പറഞ്ഞു. ദേശവിരുദ്ധ മുദ്രാവാക്യം ഉയര്‍ന്നുവെന്നത് മാത്രമല്ല ചില ദേശീയ പാര്‍ട്ടികള്‍ അതിനെ പിന്തുണയ്ക്കുന്നുവെന്നതും ദുരന്തമാണ്. ദേശദ്രാഹം അഭിപ്രായ സ്വാതന്ത്ര്യത്തിന്റെ ഭാഗമാണെന്ന് ഇടത്പക്ഷം പറയുന്നത് അംഗീകരിക്കാനാവില്ല.
പട്യാലഹൗസ് കോടതിയില്‍ നടന്നത് അപലപനീയമാണ്. എന്നാല്‍ അതില്‍ മാത്രം ശ്രദ്ധിച്ചാല്‍ മതിയെന്ന ഇടതു പാര്‍ട്ടികളുടെ നിലപാട് ശരിയല്ല. ദേശദ്രോഹം അഭിപ്രായ സ്വാതന്ത്യത്തിന്റെ ഭാഗമാണെന്നാണ് അവര്‍ പറയുന്നത്. വിദ്വേഷ പ്രസംഗം അഭിപ്രായ സ്വാതന്ത്ര്യമാണോ?. ജെ.എന്‍.യുവില്‍ വിതരണം ചെയ്യപ്പെട്ട ലഘുലേഖകള്‍ കൂടുതലും ആക്രമിച്ചിരിക്കുന്നത് യു.പി.എ സര്‍ക്കാരിനെയാണ്. കശ്മീര്‍ നെഹ്‌റുവിന്റേയോ മന്‍മോഹന്റേയോ മോദിയുടേയോ അല്ലെന്നാണ് അതില്‍ പറയുന്നത്. ജയ്റ്റലി പറഞ്ഞു. ജെഎന്‍യുവിലെ സമരത്തില്‍ പങ്കെടുത്തവര്‍ക്ക് മാവോയിസ്റ്റ് ബന്ധമുണ്ട്. മുഖംമറച്ച് ചില മാവോവാദികളും വിഘടനവാദികളും യോഗത്തില്‍ പങ്കെടുത്തിരുന്നു. അവര്‍ ഇന്ത്യാ വിരുദ്ധ മുദ്രാവാക്യങ്ങളും വിളിച്ചു. അപ്പോള്‍ പോലീസ് എന്ത് ചെയ്യണമായിരുന്നു എന്നും മന്ത്രി ചോദിച്ചു.
സംഭവത്തിന് ഉത്തരവാദികളായവരെയാണ് അറസ്റ്റ് ചെയതിരിക്കുന്നതെന്നും ഇടത്പക്ഷം കണ്ണടച്ച് ഇരുട്ടാക്കരുതെന്നും ജയ്റ്റ്‌ലി പാര്‍ലമെന്റില്‍ പറഞ്ഞു.
മൂന്ന് കോണ്‍ഗ്രസ് പാര്‍ട്ടികളാണ് ബംഗാളിന്റെ ദുരന്തം എന്ന് പറഞ്ഞ ജയ്റ്റ്‌ലി അത് കോണ്‍ഗ്രസ്, തൃണമൂല്‍ കോണ്‍ഗ്രസ്, മാര്‍ക്‌സിസ്റ്റ് കോണ്‍ഗ്രസ് എന്നിങ്ങനെയാണെന്നും വിശദീകരിച്ചു.
കശ്മീരില്‍ പിഡിപിയുമായുള്ള ബന്ധം ദേശീയ താല്‍പര്യത്തിന് അനുസൃതമാണെന്നും, മുന്‍പ് കോണ്‍ഗ്രസ് ഇത് ചെയ്തിട്ടുണ്ടെന്നും ജയ്റ്റലി ഇത് സംബന്ധിച്ച ചോദ്യത്തിന് മറുപടിയായി വിശദീകരിച്ചു.
വീഡിയൊ
Discussion about this post