ധാരാളം ആരോഗ്യഗുണങ്ങളുള്ള ഭക്ഷണമാണ് മുട്ട. മഞ്ഞക്കരുവില്‍ കൊഴുപ്പും ജീവകവും ധാതുക്കളും വെള്ളയില്‍ പ്രോട്ടീനും ഉണ്ട്. മുട്ടയിലെ പ്രോട്ടീന്‍ എളുപ്പത്തില്‍ ദഹിക്കുകയും ആഗിരണം ചെയ്യപെടുകയും ചെയ്യും. എന്നാല്‍ മുട്ട പെട്ടെന്ന് കേടാകുകയും ചെയ്യും. എങ്ങനെ നല്ല മുട്ട തിരിച്ചറിയാം അതുപോലെ തന്നെ കേടാകാതിരിക്കാന്‍ എന്തൊക്കെ മുന്‍കരുതലുകള്‍ സ്വീകരിക്കാമെന്നും നോക്കാം.
കടയില്‍നിന്ന് വാങ്ങിക്കൊണ്ടുവരുന്ന മുട്ട രണ്ട് ആഴ്ചയില്‍ കൂടുതല്‍ പുറത്തു വയ്ക്കരുത്.കാരണം ഇതിലെ വെള്ളക്കരുവിലെ ജലാംശം ബാഷ്പീകരിച്ച് നഷ്ടമാകുകയും മഞ്ഞക്കരു മുട്ടതോടുമായി ബന്ധപെടുകയും ചെയ്യും. തോടിലെ സുഷിരത്തിലൂടെ ബാക്ടീരിയകള്‍ മഞ്ഞക്കരുവില്‍ പ്രവേശിച്ച് അമിനോ ആസിഡുകളായി പ്രവര്‍ത്തിച്ച് ഹൈഡ്രജന്‍ സള്‍ഫൈഡ് എന്ന ദുര്‍ഗന്ധ വാതകം ഉണ്ടാക്കുന്നു.
മഞ്ഞക്കരു കണ്ടാലറിയാം മുട്ടയുടെ ഗുണനിലവാരം. ഇത് നല്ല മഞ്ഞനിറത്തില്‍ ഉറച്ചിരിക്കണം. മുട്ട പൊട്ടിച്ചു കയ്യിലേക്കൊഴിച്ചാല്‍ ഉണ്ണി കയ്യില്‍ നില്‍ക്കുകയും വെള്ളക്കരു അപ്പാടെ താഴേക്കു പോകുകയും ചെയ്താല്‍ മുട്ട നല്ലതാണ്. മുട്ടയില്‍ രക്തക്കറ കണ്ടാല്‍ ഉപയോഗിക്കരുത്. വെള്ള കലങ്ങിയിരിക്കാനും പാടില്ല.
മുട്ട നല്ലതോ ചീത്തയോ എന്നറിയാന്‍
ഉപ്പിട്ട വെള്ളത്തില്‍ മുട്ട വയ്ക്കുക. നല്ലതാണെങ്കില്‍ താഴ്ന്നുതന്നെ കിടക്കും. ചീത്തയാകാന്‍ തുടങ്ങിയെങ്കില്‍ പരന്ന അറ്റം വെള്ളത്തില്‍ ഉയര്‍ന്നിരിക്കും. കൂര്‍ത്ത അറ്റം താഴെയും പരന്ന അറ്റം മുകളിലുമായി കുത്തനെ നില്‍ക്കുന്നെങ്കില്‍ ആ മുട്ട ഉപയോഗിക്കരുത്.
ഫ്രിഡ്ജിനു വെളിയില്‍ വയ്ക്കുകയാണെങ്കില്‍ മുട്ടയുടെ പുറത്ത് എണ്ണമയം പുരട്ടണം. മുട്ട പുഴുങ്ങുമ്പോള്‍ മുട്ടയുടെ ഒരിഞ്ചുയരത്തില്‍ വെള്ളം നില്‍ക്കണം. വെള്ളത്തില്‍ അല്‍പം ഉപ്പിടണം. മുട്ടത്തോടില്‍ ഉണ്ടായേക്കാവുന്ന പൊട്ടലിലൂടെ വെള്ള പുറത്തേക്കു ചാടാതിരിക്കാനാണ് ഇത്
മുട്ട അടിക്കുമ്പോള്‍, വെള്ളക്കരുവില്‍ അല്‍പം ഉപ്പു ചേര്‍ത്തടിച്ചശേഷമേ മഞ്ഞക്കരു ചേര്‍ത്തടിക്കാവൂ. മുട്ട വേവിക്കാതെ കഴിക്കുന്നത് നല്ലതല്ല. മുട്ട ആവിയില്‍ വേവിക്കുന്നതാണ് ഉത്തമം. . ഹൃദ്രോഗം, രക്തസമ്മര്‍ദം, കൊഴുപ്പ് ഉള്ളവര്‍ മഞ്ഞക്കരു ഒഴിവാക്കണം.
Discussion about this post