ചെന്നൈ; തന്റെ ശബ്ദം നഷ്ടപ്പെടാൻ ഉണ്ടായ സംഭവത്തെ കുറിച്ച് വെളിപ്പെടുത്തി ഗായിക മിൻമിനി. ഇളയരാജയിൽ നിന്നുണ്ടായ ദുരനുഭവമാണ് തന്റെ ശബ്ദം നഷ്ടപ്പെടാൻ കാരണമായെന്നാണ് ഗായികയുടെ ആരോപണം. ഇളയരാജയിൽ നിന്ന് കേൾക്കേണ്ടി വന്ന ഒരു ശകാരത്തെ തുടർന്നുണ്ടായ ആഘാതമാണ് തനിക്ക് ഈ അവസ്ഥ നേരിടാൻ കാരണമെന്ന് മിൻമിനി പറയുന്നു.
. ചുരുങ്ങിയ വർഷങ്ങൾ മാത്രമേ മിൻമിനി ഇന്റസ്ട്രിയിൽ സജീവമായി നിന്നിട്ടുള്ളൂ. അതൊരു സുവർണ കാലം തന്നെയായിരുന്നു. ‘പാതിരാവായി നേരം…’ എന്ന പാട്ടൊക്കെ മലയാളികൾ ഇന്നും കേട്ടാസ്വദിക്കുന്നതാണ്. മീര എന്ന സിനിമയിലൂടെ മിൻമിനിയെ തമിഴ് സിനിമാ ലോകത്തിന് പരിചയപ്പെടുത്തിയത് ഇളയരാജയാണ്. പിജെ റോസ്ലി എന്ന ഗായികയ്ക്ക് മിൻമിനി എന്ന പേര് നൽകിയതും ഇളയരാജ തന്നെ.
മിൻമിനിയുടെ വാക്കുകളിലേക്ക്…….
രാജാസാറിന്റെ അടുത്ത് ചാൻസ് കിട്ടി. അന്നുമുതൽ എത്രനാൾ ഞാൻ രാജാ സാറിന് വേണ്ടി പാടിയോ അത്രയും നാൾ 1500 രൂപയാണ് എനിക്ക് കിട്ടികൊണ്ടിരുന്നത്. ചേച്ചിയുടെ കല്യാണം കഴിഞ്ഞുണ്ടായ കുറച്ചു ബാധ്യതകൾ അങ്ങനെ തീർത്തു. ഒരു സ്റ്റുഡിയോയിൽ മാത്രം പാടിയാൽ തീരുന്നതായിരുന്നില്ല എന്റെ ഉത്തരവാദിത്തങ്ങൾ. ആ സമയത്ത് ദേവാ സാറിന്റെയും വിദ്യാസാഗറിന്റെയും കീരവാണി സാറിന്റെയുമൊക്കെ ഒത്തിരി പാട്ടുകൾ പാടിയിട്ടുണ്ട്. ഇതൊന്നും രാജാ സാർ അറിയുന്നുണ്ടായിരുന്നില്ല. അറിഞ്ഞത് ചിന്ന ചിന്ന ആസൈ പാടിയപ്പോഴാണ്.ആ പാട്ട് ഹിറ്റായിക്കൊണ്ടിരിക്കുന്ന സമയം, രാജാ സാറിന്റെ താലാട്ട് എന്ന ചിത്രത്തിന്റെ റെക്കോർഡിംഗ് എ.വി.എം. ആർ.ആർ സ്റ്റുഡിയോയിൽ നടക്കുകയാണ്. ടേക്ക് എടുക്കുന്നതിന് മുമ്പ് സാർ ചെറിയ കറക്ഷൻസ് പറഞ്ഞുതരാൻ വന്നു. ഗായകൻ മനോ അണ്ണനും അവിടെയുണ്ടായിരുന്നു. കറക്ഷനുകളൊക്കെ പറഞ്ഞുതന്നിട്ട് സാർ തിരിച്ചുപോയി. പക്ഷേ മുറിയുടെ വാതിലിന്റെ അടുത്തുവരെ പോയിട്ട് തിരിച്ചുവന്നു. എന്നിട്ട് പറഞ്ഞു, നീ എന്തിനാണ് അവിടെയും ഇവിടെയുമെല്ലാം പോയി പാടുന്നത്, ഇവിടെ മാത്രം പാടിയാൽ മതി. അതെനിക്ക് ഭയങ്കര ഷോക്കായിപ്പോയി. ഞാനവിടെ നിന്ന് കരയുകയാണ്. മൈക്കെല്ലാം ഓണാണ്. മനോ അണ്ണൻ ആശ്വസിപ്പിക്കാൻ ശ്രമിച്ചു. ഒരാൾ എഴുന്നേറ്റു വന്നു. കീ ബോർഡ് ചെയ്തിരുന്ന അന്തരിച്ച വിജി മാനുവൽ അങ്കിളായിരുന്നു അത്. കരയരുതെന്നും വെറുതെ പറഞ്ഞതായിരിക്കുമെന്നും പറഞ്ഞു. പക്ഷേ ഈ സംഭവം ശബ്ദം പോകത്തക്ക രീതിയിലുള്ള ഷോക്കായിരുന്നോ എന്ന് അറിയില്ല. ഉള്ളിലെവിടെയോ വിഷമമായി കിടന്നിരിക്കാം. ഈ സംഭവത്തിന് ശേഷം പാടാൻ ഇളയരാജ വിളിച്ചിട്ടില്ല.രാജാ സാറിനോട് വെറുപ്പോ വിദ്വേഷമോ ഒന്നുമില്ല. പക്ഷേ ഞാൻ എന്ന കുഞ്ഞുവ്യക്തി ഏത് അവസ്ഥയിലായിരുന്നെന്ന് സാറിന് അറിയില്ല. നീ പാടണ്ട എന്ന് പറയുമ്പോൾ ഇത്രയും ഭാരങ്ങളുള്ള ആൾ എന്ത് ചെയ്യണം. എന്റെ അപ്പച്ചനെ പോലുള്ള ഒരാളാണ് രാജാ സാർ. അദ്ദേഹത്തിന്റെ അഭിപ്രായം അത്രമാത്രം എന്നെ സ്പർശിച്ചു. എന്റെ മനസിൽ അത്രത്തോളം വിഷമമുണ്ടാക്കി എന്ന് ഞാൻ പോലും അറിയുന്നില്ലെന്ന് മിൻമിനി പറയുന്നു.
Discussion about this post