ഉത്തര്പ്രദേശിലെ സൊറാഹ ഗ്രാമത്തില് സ്ഥാപിച്ചിരുന്ന ട്രാന്സ്ഫോര്മര് കള്ളന് കൊണ്ടുപോയതിന് പിന്നാലെ മൂന്നാഴ്ചയായി ഗ്രാമത്തിലെ വിദ്യാര്ത്ഥികളും കര്ഷകരും ഉള്പ്പെടെ അയ്യായിരത്തിലധികം പേര് വൈദ്യുതിയില്ലാതെ ഇരുട്ടില്. ഡിസംബര് 15നാണ് ട്രാന്സ്ഫോര്മര് മോഷണം പോയ കാര്യം നാട്ടുകാര് അറിയുന്നത്. ട്രാന്സ്ഫോര്മറില് നിന്ന് ചെമ്പ് കമ്പികളും, ഓയിലും മോഷ്ടിച്ച കള്ളന്മാര് ട്രാന്സ്ഫോര്മറിന്റെ അവശേഷിക്കുന്ന ഭാഗം തൊട്ടടുത്തുള്ള പാടത്ത് ഉപേക്ഷിച്ചു.
വൈദ്യുതി മുടങ്ങിയതോടെ ജലസേചനത്തിനായി കര്ഷകര്ക്ക് ഇലക്ട്രിക് പമ്പുകള് ഉപയോഗിക്കാന് കഴിയുന്നില്ല. കൂടാതെ പരീക്ഷകള്ക്കായി തയ്യാറെടുക്കുന്ന വിദ്യാര്ത്ഥികളുടെ പഠനവും ഇതോടെ തടസ്സപ്പെട്ടിരിക്കുകയാണ്. ഡീസല് ജനറേറ്ററുകളെ ആശ്രയിക്കാന് ഗ്രാമീണര് നിര്ബന്ധിതരായിട്ടുണ്ട് എന്നാല് ഇവയ്ക്ക് വലിയ ചിലവാണ്. ട്രാന്സ്ഫോര്മര് മോഷണം ഉത്തര്പ്രദേശ് പവര് കോര്പ്പറേഷന് ലിമിറ്റഡ് സ്ഥിരീകരിച്ചു. കൂടാതെ ഇതുസംബന്ധിച്ച് പോലീസില് പരാതി നല്കുകയും ചെയ്തു. ” സംഭവത്തെക്കുറിച്ച് അന്വേഷിച്ച് വരികയാണ്. എത്രയും വേഗം ട്രാന്സ്ഫോര്മര് സ്ഥാപിക്കാനുള്ള നടപടികള് സ്വീകരിക്കും,” എന്ന് പവര് കോര്പ്പറേഷന് ലിമിറ്റഡ് വക്താവ് അറിയിച്ചു.
താല്ക്കാലികമായി ഗ്രാമത്തില് വൈദ്യുതിയെത്തിക്കാനുള്ള നടപടി സ്വീകരിച്ചുവെന്ന് വിദ്യുച്ഛക്തി വകുപ്പിലെ എക്സിക്യൂട്ടീവ് എന്ജീനിയറായ നരേന്ദ്ര ചൗധരി പറഞ്ഞു. ‘അടുത്തുള്ള ഗ്രാമത്തില് നിന്ന് സൊറാഹയിലേക്ക് വൈദ്യുതിയെത്തിക്കാന് ഉത്തരവിട്ടിട്ടുണ്ട്. ഒരാഴ്ചയ്ക്കുള്ളില് തന്നെ പുതിയ ട്രാന്സ്ഫോര്മര് സ്ഥാപിക്കുമെന്ന് അധികൃതര് ഉറപ്പുനല്കി. എന്നാല് ഇത്തരം മോഷണം ആവര്ത്തിക്കാതിരിക്കാനുള്ള നടപടി സ്വീകരിക്കണമെന്നാണ് ഗ്രാമീണരുടെ ആവശ്യം.
