ടെക്‌സസ്: ടെക് ലോകം മുഴുവന്‍ അമേരിക്കയിലേക്ക് കണ്ണുനട്ട് ഒരു മുഹൂര്‍ത്തത്തിനായി കാത്തിരിക്കുകയാണ് . ചൈനീസ് സോഷ്യല്‍ മീഡിയ പ്ലാറ്റ്ഫോമായ ടിക്ടോക്കിന്റെ അമേരിക്കന്‍ ബിസിനസ് എക്‌സ് ഉടമ ഇലോണ്‍ മസ്‌ക് സ്വന്തമാക്കുമോ എന്നതാണ്ഏവരും ഉറ്റുനോക്കുന്നത്. അമേരിക്കയില്‍ ടിക്ടോക്കിന് വരാനിടയുള്ള നിരോധനം മറികടക്കാനുള്ള കുറുക്കുവഴിയായി ആപ്പിന്റെ യുഎസ് ഇടപാടുകള്‍ മസ്‌കിനെ ഏല്‍പിക്കാന്‍ ടിക്ടോക്കിനും താല്‍പര്യമുണ്ട് എന്ന് റിപ്പോര്‍ട്ടുകളുണ്ട്.
ജനുവരി 19ന് മുമ്പ് ടിക്ടോക് ഏതെങ്കിലും അമേരിക്കന്‍ കമ്പനിക്ക് വില്‍ക്കുകയോ യുഎസിലെ പ്രവര്‍ത്തനം പൂര്‍ണമായും അവസാനിപ്പിക്കുകയോ വേണം. ഈ സാഹചര്യത്തിലാണ് ഇലോണ്‍ മസ്‌ക് അടക്കമുള്ള വമ്പന്‍മാര്‍ ടിക്ടോകിന്റെ അമേരിക്കന്‍ ബിസിനസ് വാങ്ങാനായി രംഗപ്രവേശം ചെയ്തിരിക്കുന്നത്. ഇലോണ്‍ മസ്‌കിന് പുറമെ ആമസോണ്‍, മൈക്രോസോഫ്റ്റ്, ഒറാക്കിള്‍ അടക്കമുള്ള വമ്പന്‍ കമ്പനികള്‍ക്കും ടിക്ടോകിന്റെ യുഎസ് ബിസിനസ് വാങ്ങാന്‍ താല്‍പര്യമുണ്ട് എന്നാണ് സൂചന.
ബൈറ്റ് ഡാന്‍സിന്റെ ഉടമസ്ഥതയിലുള്ള ചൈനീസ് ഷോര്‍ട്-വീഡിയോ പ്ലാറ്റ്ഫോമാണ് ടിക്ടോക്. എന്നാല്‍ ടിക്ടോക്കിനെ സുരക്ഷാ കാരണം പറഞ്ഞാണ് നിരോധിക്കാനാണ് അമേരിക്ക ആലോചിക്കുന്നത്. ഈ നിരോധനം മറികടക്കണമെങ്കില്‍ ടിക്ടോകിന്റെ അമേരിക്കന്‍ ബിസിനസ് യുഎസ് കമ്പനികളിലൊന്ന് ഏറ്റെടുക്കണം.
അതേസമയം ടിക്ടോക്കിന്റെ അമേരിക്കന്‍ ബിസിനസ് ഇലോണ്‍ മസ്‌ക് ഏറ്റെടുക്കുമോ എന്ന ചോദ്യം കെട്ടുകഥ എന്നുപറഞ്ഞ് തള്ളുകയാണ് ടിക്ടോക് വക്താവ് മൈക്കില്‍ ഹ്യൂസ് ചെയ്തത്. ഡീലിനെ കുറിച്ച് മസ്‌കും ഇതുവരെ മനസുതുറന്നിട്ടില്ല. എന്തായാലും ടിക്ടോക്കിന്റെ അമേരിക്കയിലെ ഭാവിയെ കുറിച്ച് മണിക്കൂറുകള്‍ക്കുള്ളില്‍ അറിയാം.
