കാലിഫോര്‍ണിയ: ഒരു അത്യാവശ്യഘട്ടത്തില്‍ തന്റെ പിതാവിന്റെ ജീവന്‍ രക്ഷിച്ച ആപ്പിള്‍ വാച്ചിനെക്കുറിച്ച് വാചാലനായി ആപ്പിള്‍ സിഇഒ ടിം കുക്ക്.
തനിച്ച് താമസിച്ചുവരികയായിരുന്ന കുക്കിന്റെ പിതാവ് ഒരിക്കല്‍ ബോധരഹിതനായി വീഴുകയായിരുന്നു. എന്നാല്‍ കയ്യിലുണ്ടായിരുന്ന ആപ്പിള്‍ വാച്ചിലെ, അത്യാവശ്യ ഘട്ടങ്ങളില്‍ പ്രവര്‍ത്തിക്കുന്ന അലെര്‍ട് ഫീച്ചര്‍ സഹായകരമായി. സമയമൊട്ടും കളയാതെ തന്നെ തന്നെ വീട്ടിലേക്ക് എത്തുവാനും പിതാവിന്റെ ജീവന്‍ രക്ഷിക്കുവാനും സാധിച്ചതായി ടേബിള്‍ മാനേഴ്‌സ് എന്ന ഡിജിറ്റല്‍ പ്ലാറ്റ്ഫോമിന്റെ അഭിമുഖത്തില്‍ ടിം കുക്ക് വെളിപ്പെടുത്തി.
ഇങ്ങനെയുള്ള അടിയന്തിര ഘട്ടങ്ങളില്‍ അലെര്‍ട് നല്‍കുക മാത്രമല്ല, ഒപ്പം എമര്‍ജന്‍സി സര്‍വീസിലേക്ക് നേരിട്ട് ഫോണ്‍ കോള്‍ പോവുകയും ചെയ്യുന്നതാണ് ആപ്പിള്‍ വാച്ചിന്റെ ഈ ഫീച്ചര്‍. ഇതോടെ ആളുകള്‍ക്ക് പെട്ടെന്ന് സംഭവ സ്ഥലത്തേക്ക് എത്തുവാനും ആളെ രക്ഷിക്കുവാനും കഴിയും.
ആപ്പിള്‍ ഗാഡ്ജറ്റുകള്‍ മൂലം രക്ഷപ്പെട്ട ആളുകള്‍ ധാരാളമുണ്ട്. ദില്ലിയില്‍ ഒരു പെണ്‍കുട്ടിയുടെ ഹൃദയമിടിപ്പ് കൂടുതലാണെന്ന് ആപ്പിള്‍ വാച്ചിന്റെ ഇസിജി ഡിക്ടറ്റര്‍ ഫീച്ചര്‍ തിരിച്ചറിഞ്ഞതാണ് ഒരു സംഭവം. വാഹനാപകടത്തില്‍പ്പെട്ട ഒരു യുവാവിന് രക്ഷകനായത് ആപ്പിള്‍ വാച്ചിന്റെ ഫാള്‍ ഡിറ്റക്ഷന്‍ ഫീച്ചറായിരുന്നു എന്നത് മറ്റൊരു ശ്രദ്ധേയമായ വസ്തുതയാണ്.
