ശ്രീനഗർ : ഇന്ത്യയുടെ സൈനിക ആസ്ഥാനങ്ങൾക്ക് നേരേ പാകിസ്താൻ ആക്രമിക്കാൻ ശ്രമിച്ചതായി ഇന്ത്യൻ സൈന്യം വ്യക്തമാക്കി. അന്താരാഷ്ട്ര അതിർത്തിക്ക് സമീപം ജമ്മു, പഠാൻകോട്ട്, ഉധമ്പൂർ സൈനിക കേന്ദ്രങ്ങൾക്ക് നേരേയാണ് ആക്രമണം നടന്നത്. മിസ്സൈലുകളും ഡ്രോണുകളും ഉപയോഗിച്ച് നടത്തിയ ആക്രമണശ്രമം തകർത്തതായും ഇന്ത്യൻ സംയുക്ത സൈനിക കേന്ദ്രത്തിൽ നിന്ന് വ്യക്തമാക്കി.
ആളപായം ഉണ്ടായിട്ടില്ലെന്നും ശക്തമായ പ്രതിരോധ സംവിധാനങ്ങൾ ഉപയോഗിച്ചാണ് ആക്രമണം തടഞ്ഞതെന്നും സൈന്യം പുറത്തുവിട്ട പ്രസ്താവനയിൽ പറയുന്നു.
ജമ്മുവിൽ ശക്തമായ ഡ്രോൺ ആക്രമണം ഉണ്ടായതായി നേരത്തെ റിപ്പോർട്ടുകൾ ഉണ്ടായിരുന്നു. ഇതിന്റെ നിരവധി വീഡിയോ ദൃശ്യങ്ങളും പുറത്തുവന്നിരുന്നു. ജമ്മുവിൽ മാത്രമല്ല പഞ്ചാബിലും രാജസ്ഥാനിലും ഗുജറാത്തിലും ആക്രമണ ശ്രമമുണ്ടായെന്നാണ് റിപ്പോർട്ടുകൾ വ്യക്തമാക്കുന്നത്. ഇന്ത്യൻ വ്യോമ പ്രതിരോധ സംവിധാനം ഡ്രോണുകളെ തകർക്കുകയായിരുന്നു. പാകിസ്താന്റെ പോർ വിമാനവും വെടിവെച്ചിട്ടതായി സ്ഥിരീകരിക്കാത്ത റിപ്പോർട്ടുകളുണ്ട്.
അതേസമയം ഇന്ത്യ ലാഹോറിൽ തിരിച്ചടിച്ചതായും സൂചനകളുണ്ട്.
Discussion about this post