ബാങ്കോക്ക് : തായ്ലൻഡ് പ്രധാനമന്ത്രി പെയ്റ്റോങ്ടൺ ഷിനവത്രയെ സസ്പെൻഡ് ചെയ്ത് രാജ്യത്തെ ഭരണഘടനാ കോടതി. കംബോഡിയയുടെ മുൻ പ്രധാനമന്ത്രിയുമായുള്ള ഫോൺ സംഭാഷണത്തിന്റെ ഓഡിയോ ചോർന്നതിന് പിന്നാലെയാണ് നടപടി. കഴിഞ്ഞ ദിവസങ്ങളിൽ പ്രധാനമന്ത്രിയുടെ രാജി ആവശ്യപ്പെട്ട് തായ്ലൻഡിൽ പ്രതിഷേധങ്ങൾ നടന്നിരുന്നു. ഇതിന് പിന്നാലെയാണ് ഇപ്പോൾ ഭരണഘടന കോടതിയുടെ ഉത്തരവ്. തായ്ലൻഡിൽ ഒരു വർഷത്തിനുള്ളിൽ പുറത്താവുന്ന രണ്ടാമത്തെ പ്രധാനമന്ത്രിയാണ് പെയ്റ്റോങ്ടൺ ഷിനവത്ര.
പ്രധാനമന്ത്രി ഗുരുതരമായ ധാർമ്മിക ലംഘനങ്ങൾ നടത്തിയെന്ന് ആരോപിച്ച് സമർപ്പിച്ച ഹർജി പരിഗണിക്കുന്നതിനിടെയാണ് ഭരണഘടനാ കോടതി ഈ ഉത്തരവ് പുറപ്പെടുവിച്ചത്. അന്വേഷണം പൂർത്തിയാകുന്നതുവരെ പ്രധാനമന്ത്രിയെ സസ്പെൻഡ് ചെയ്യുന്നതായി കോടതി അറിയിച്ചു. ഭരണഘടന കോടതിയുടെ തീരുമാനത്തെ അംഗീകരിക്കുകയും പിന്തുടരുകയും ചെയ്യുമെന്ന് ഷിനവത്ര പറഞ്ഞു.
തായ് പ്രധാനമന്ത്രി പെയ്റ്റോങ്ടാർൺ ഷിനവത്രയും കംബോഡിയയുടെ മുൻ നേതാവും ഇപ്പോഴത്തെ സെനറ്റ് പ്രസിഡന്റും നിലവിലെ പ്രധാനമന്ത്രി ഹുൻ മാനെറ്റിന്റെ പിതാവുമായ ഹുൻ സെന്നും തമ്മിലുള്ള ചോർന്ന ഫോൺ കോളാണ് വിവാദത്തിന് കാരണം.
മെയ് 28 ന് തായ്ലൻഡ്-കംബോഡിയ അതിർത്തിയിൽ ഒരു മാരകമായ സൈനിക ഏറ്റുമുട്ടലിൽ ഒരു കംബോഡിയൻ സൈനികൻ കൊല്ലപ്പെട്ടതിന് തൊട്ടുപിന്നാലെയാണ് ഈ കോൾ ചോർന്നത്. ഹുൻ സെന്നിനെ “അങ്കിൾ” എന്നായിരുന്നു ഈ ഫോൺ കോളിൽ തായ്ലൻഡ് പ്രധാനമന്ത്രി വിശേഷിപ്പിച്ചിരുന്നത്. അതിർത്തിയിലെ ഏറ്റുമുട്ടലിൽ ഉൾപ്പെട്ട ഒരു പ്രാദേശിക തായ് സൈനിക കമാൻഡറെ വിമർശിക്കുന്നതും ചോർന്ന കോളിൽ ഉണ്ടായിരുന്നു.
“നിങ്ങൾക്ക് എന്തെങ്കിലും വേണമെങ്കിൽ, ഞാൻ അത് ചെയ്തുതരാം” എന്ന് അവർ ഹുൻ സെന്നിനോട് പറഞ്ഞതായും റിപ്പോർട്ടുണ്ട്. ഒരു വിദേശ സർക്കാരിനെ പ്രീണിപ്പിക്കുന്ന നടപടിയാണ് തായ്ലൻഡ് പ്രധാനമന്ത്രിയുടെ ഭാഗത്തുനിന്നും ഉണ്ടായത് എന്നതിനാൽ കടുത്ത പ്രതിഷേധം ആയിരുന്നു രാജ്യത്ത് അരങ്ങേറിയത്.
