2025 ലെ ഏഷ്യാ കപ്പിൽ നിന്ന് ഒഴിവാക്കപ്പെട്ട ശ്രേയസ് അയ്യർ, രോഹിത് ശർമ്മയ്ക്ക് പകരം ഏകദിന ക്യാപ്റ്റനാകാൻ സാധ്യതയുണ്ട് എന്ന് റിപ്പോർട്ടുകൾ. വൈറ്റ്-ബോൾ ക്രിക്കറ്റിൽ നിലവിലെ ഫോമിൽ ശ്രേയസിനെ ഒഴിവാക്കിയുള്ള ടീം ആരും പ്രതീക്ഷിച്ചിരുന്നില്ല. ഒരു വർഷത്തിലേറെയായി ടി20 ഐ ടീമിൽ നിന്ന് പുറത്തായിരുന്ന ശുഭ്മാൻ ഗില്ലിനെ തിരിച്ചുവിളിക്കുകയും വൈസ് ക്യാപ്റ്റനായി നിയമിക്കുകയും ചെയ്യുകയാണ് ബിസിസിഐ ചെയ്തത്. ഇപ്പോൾ തന്നെ ടെസ്റ്റ് ടീമിന്റെ നായകനും ടി 20 ടീമിന്റെ ഉപനായകനുമായ ഗിൽ ഇനി ഏകദിന ടീമിന്റെയും നായകനും ആകും എന്ന് കരുതുന്നവർ ഏറെയാണ്. എന്നിരുന്നാലും, അമ്പത് ഓവർ ഫോർമാറ്റിൽ ഗിൽ ഇന്ത്യയെ നയിക്കുന്നതിനോട് ബിസിസിഐ അനുകൂലിക്കുന്നില്ല.
ദൈനിക് ജാഗരണിലെ ഒരു റിപ്പോർട്ട്, ഏകദിന മത്സരങ്ങളിൽ ദീർഘകാല ക്യാപ്റ്റൻസി ഓപ്ഷനായി അയ്യരെ പരിഗണിക്കുന്നുണ്ടെന്ന് സൂചന നൽകുന്നു. രോഹിത്തിന്റെ കൂടെ നിലപാട് അറിഞ്ഞതിന് ശേഷം 2027 ലെ ലോകകപ്പ് വരെ ശ്രേയസ് ആകും ഇന്ത്യയെ ഏകദിനങ്ങളിൽ നയിക്കുക. 70 ഏകദിന മത്സരങ്ങളിൽ നിന്ന് 48.22 ശരാശരിയിൽ 2845 റൺസ് അയ്യർ നേടിയിട്ടുണ്ട്, അഞ്ച് സെഞ്ച്വറികൾ ഇതിൽ ഉൾപ്പെടുന്നു. 2025 ലെ ഐസിസി ചാമ്പ്യൻസ് ട്രോഫി കിരീടം നേടിയ ഇന്ത്യൻ ടീമിനായി ഏറ്റവും ഉയർന്ന റൺസ് നേടിയ കളിക്കാരനായിരുന്നു അദ്ദേഹം, അഞ്ച് മത്സരങ്ങളിൽ നിന്ന് 243 റൺസ് താരം നേടി.
ഏകദിന ക്രിക്കറ്റിൽ നിന്ന് രോഹിത് ശർമ്മയും വിരാട് കോഹ്‌ലിയും വിരമിച്ചതോടെ, ഒക്ടോബറിൽ നടക്കുന്ന ഓസ്‌ട്രേലിയൻ ഏകദിന പരമ്പരയായിരിക്കും അവരുടെ അവസാന അന്താരാഷ്ട്ര ക്രിക്കറ്റിലെ പ്രകടനം എന്ന അഭ്യൂഹങ്ങൾ ശക്തമാകുന്നു. രോഹിത് ക്യാപ്റ്റൻ സ്ഥാനം ഒഴിഞ്ഞാൽ, ഓസ്‌ട്രേലിയയ്‌ക്കെതിരായ മത്സരങ്ങളിൽ നിന്ന് അയ്യർ ക്യാപ്റ്റനായി വന്നേക്കാം.
മൂന്ന് ഫോർമാറ്റിലും ഒരു നായകൻ വേണ്ട എന്ന നിലപാടിലാണ് ബിസിസിഐ എങ്കിൽ ടി 20 യിൽ സൂര്യകുമാറും ഏകദിനത്തിൽ ശ്രേയസും ടെസ്റ്റിൽ ഗില്ലുമാണ് നായകനായി നിൽക്കുക.
Discussion about this post