തൃശ്ശൂർ : സിനിമ കാണാനുള്ള തിരക്കിനിടയിൽ ഏഴ് വയസ്സുള്ള കുട്ടിയെ തിയേറ്ററിൽ മറന്ന് കുടുംബം. ഗുരുവായൂരിൽ ആണ് സംഭവം നടന്നത്. ചാവക്കാട് നിന്നും ഗുരുവായൂരിൽ സിനിമ കാണാൻ എത്തിയ കുടുംബമാണ് കുട്ടിയെ തിയേറ്ററിൽ വച്ച് മറന്നത്. ആദ്യം വന്ന തിയേറ്ററിൽ നിന്നും ടിക്കറ്റ് കിട്ടാതായതോടെ തൊട്ടടുത്തുള്ള മറ്റൊരു തിയേറ്ററിലേക്ക് കുടുംബം പോവുകയായിരുന്നു. എന്നാൽ കുട്ടി കൂടെ ഇല്ലെന്ന കാര്യം മറ്റു കുടുംബാംഗങ്ങൾ ഓർത്തത് പോലുമില്ല.
ഗുരുവായൂർ ദേവകി തിയേറ്ററിൽ ആണ് സംഭവം നടന്നത്. ഈ തിയേറ്ററിലേക്ക് എത്തിയ ചാവക്കാട് സ്വദേശികളായ കുടുംബത്തിന് സിനിമയ്ക്കുള്ള ടിക്കറ്റ് കിട്ടിയില്ല. ഇതോടെ ഇവർ തൊട്ടടുത്തുള്ള അപ്പാസ് തിയേറ്ററിലേക്ക് പോവുകയായിരുന്നു. എന്നാൽ ഇവരോടൊപ്പം വന്ന 7 വയസ്സുള്ള കുട്ടി വാഹനത്തിൽ കയറാതിരുന്നത് കുടുംബം ശ്രദ്ധിച്ചില്ല.
അപ്പാസ് തിയേറ്ററിൽ നിന്നും ടിക്കറ്റ് ലഭിച്ച കുടുംബം സിനിമയ്ക്ക് കയറിയെങ്കിലും കുട്ടി കൂടെ ഇല്ലാത്തത് അപ്പോഴും ശ്രദ്ധിച്ചില്ല. ഈ സമയം കുട്ടി കരയുന്നത് ശ്രദ്ധയിൽപ്പെട്ട ദേവകി തിയേറ്ററിലെ ജീവനക്കാർ വിവരം അന്വേഷിച്ച് അപ്പാസ് തിയേറ്ററിൽ ഉള്ളവരെ വിവരമറിയിക്കുകയായിരുന്നു. തുടർന്ന് കുട്ടിയെ ഇവർ പോലീസിനെ ഏൽപ്പിച്ചു. സിനിമ തുടങ്ങി ഒന്നരമണിക്കൂറിന് ശേഷം അപ്പാസ് തീയേറ്ററിൽ കുഞ്ഞിനെ നഷ്ടപ്പെട്ട കുടുംബത്തെക്കുറിച്ചുള്ള അന്വേഷണം അനൗൺസ്മെന്റ് ചെയ്തതോടെയാണ് തങ്ങളുടെ കൂടെയുണ്ടായിരുന്ന കുട്ടിയെ കാണാതായതായി ഈ കുടുംബം മനസ്സിലാക്കിയത്. തുടർന്ന് പോലീസ് സ്റ്റേഷനിൽ എത്തിയ കുടുംബം കുട്ടിയെ ഏറ്റെടുത്തു.
