ഡല്‍ഹി: ജനങ്ങളുടെ പരാതികള്‍ക്ക് 60 ദിവസത്തിനുളളില്‍ തീര്‍പ്പ് കല്പിക്കണമെന്ന് പ്രധാനമന്ത്രിയുടെ നിര്‍ദ്ദേശം. ഉന്നത ഉദ്യോഗസ്ഥരുമായി വീഡിയോ കോണ്‍ഫറണ്‍സിലൂടെ നടത്തിയ മീറ്റിങ്ങിലായിരുന്നു നിര്‍ദ്ദേശം. പ്രധാനമന്ത്രിയുട പ്രഗതി എന്ന ഓണ്‍ലൈനില്‍ ലക്ഷക്കണക്കിന് പരാതി രജിസ്റ്റര്‍ ചെയ്തിട്ടുണ്ട്. ഈ സാഹചര്യത്തിലാണ് പരാതികള്‍ 60 ദിവസത്തിനുള്ളില്‍ തീര്‍പ്പാക്കാനുള്ള നടപടികള്‍ സ്വീകരിക്കുന്നതിന് പ്രധാനമന്ത്രി നിര്‍ദ്ദേശം നല്‍കിയിരിക്കുന്നത്. പ്രഗതിയിലൂടെ വന്ന പരാതികള്‍ അതാത് വകുപ്പുകള്‍ തിരിച്ച് പരിഹരിക്കാനും മോദി അറിയിച്ചു.
ജനങ്ങളില്‍ നിന്നും പ്രധാനമന്ത്രിയുടെ ഓഫീസിലേക്ക് നേരിട്ട് പരാതി അയക്കുന്ന സംവിധാനമാണ് പ്രഗതി. 2015 മാര്‍ച്ച് മാസത്തിലാണ് പ്രഗതിയുടെ പ്രവര്‍ത്തനങ്ങള്‍ ആരംഭിച്ചത്. അതേസമയം പ്രഗതിയിലേക്ക് അയക്കുന്ന പരാതികള്‍ക്ക് പരിഹാരം കാണുന്നില്ല എന്ന പൊതുവായ വിമര്‍ശനവും ഉയര്‍ന്നിരുന്നു. ഈ സാഹചര്യത്തിലാണ് പരാതികള്‍ ഉടന്‍ പരിഹരിക്കാന്‍ പ്രധാനമന്ത്രി നിര്‍ദേശം നല്‍കിയത്. റോഡ്, റെയില്‍വ്വേ, പവര്‍, ഓയില്‍ എന്നീ മേഖലകളുടെ വളര്‍ച്ചയ്ക്കും മോദി സര്‍ക്കാര്‍ ശ്രദ്ധ നല്‍കുന്നുണ്ട്. ഭൂമി ഇടപാടുകള്‍ ഓണ്‍ലൈന്‍ വഴിയാക്കുന്നതിനും ആധാര്‍ കാര്‍ഡുകള്‍ വ്യാപകമാകുന്നതിനും എത്രയും പെട്ടെന്ന് നടപടികള്‍ സ്വീകരിക്കാന്‍ ഉദ്യോഗസ്ഥരോട് പറഞ്ഞു.
Discussion about this post