രാജ്യത്തിന്റെ തന്ത്രപ്രധാനമായ സിലിഗുരി ഇടനാഴിയിൽ നിർണായക സൈനിക വിന്യാസം നടത്തി ശക്തിവർദ്ധിപ്പിക്കുകയാണ് ഇന്ത്യ. ഇടനാഴിയിൽ മൂന്ന് പുതിയ കാവൽ സൈനിക കേന്ദ്രങ്ങളാണ് ഇന്ത്യ വിന്യസിപ്പിച്ചിട്ടുള്ളത്. പശ്ചിമബംഗാളിലെ ചോപ്ര, ബീഹാറിലെ കിഷൻഗഞ്ച്, അസമിലെ ധുബ്രി എന്നിവിടങ്ങളിലാണ് പട്ടാള ഗാരിസണുകൾ ഒരുക്കിയിട്ടുള്ളത്. സിലിഗുരി ഇടനാഴി കൂടുതൽ സുരക്ഷിതമാക്കുക എന്നതാണ് ലക്ഷ്യം.
പശ്ചിമ ബംഗാളിലെ അതിർത്തി മേഖലയാണ് സിലിഗുരി. ഈ പ്രദേശത്തെ മറ്റു രാജ്യങ്ങളുമായും വടക്കുകിഴക്കൻ സംസ്ഥാനങ്ങളുമായും ബന്ധിപ്പിക്കുന്നത് സിലിഗുരി ഇടനാഴിയാണ്. കോഴിയുടെ കഴുത്ത് എന്നും ഈ സ്ഥലത്തിന് വിളിപ്പേരുണ്ട്. 17 കിലോമീറ്റർ മാത്രമാണ് ഈ പ്രദേശത്തിന്റെ വീതി. നേപ്പാൾ, ബംഗ്ലാദേശ്, ഭൂട്ടാൻ എന്നീ രാജ്യങ്ങളുമായി അതിർത്തി പങ്കിടുന്ന പ്രദേശമാണിത്.
വടക്കു കിഴക്കൻ സംസ്ഥാനങ്ങളും മറ്റു സംസ്ഥാനങ്ങളും തമ്മിലുള്ള ഏക റെയിൽ, റോഡ് മാർഗവും സിലിഗുരി ഇടനാഴിയാണ്. രാജ്യത്തിന്റെ അതിർത്തി പ്രദേശങ്ങളിലേക്ക് സൈനികർ അവശ്യവസ്തുക്കൾ എത്തിക്കുന്നതും ഇതുവഴിയാണ്. അതുകൊണ്ടുതന്നെ രാജ്യത്തിന്റെ സുരക്ഷയ്ക്ക് സുപ്രധാന പങ്കാണ് സിലിഗുരി കോറിഡോറിനുള്ളത്.
Discussion about this post