ഇത് അയാളുടെ കാലമല്ലേ, കലക്കൻ റെക്കോഡ് പോക്കറ്റിലാക്കി രോഹിത്; ഇനി മറ്റുള്ളവർക്ക് അതൊക്കെ സ്വപ്നം മാത്രം

ദക്ഷിണാഫ്രിക്കയ്‌ക്കെതിരായ ഏകദിന പരമ്പരയിലെ ആദ്യ മത്സരത്തിലൂടെ ഇന്ത്യൻ വെറ്ററൻ ബാറ്റ്‌സ്മാൻ രോഹിത് ശർമ്മ ചരിത്രത്തിന്റെ ഭാഗമായിരിക്കുകയാണ്. 38 കാരനായ രോഹിത് ശർമ്മ ഏകദിന ഫോർമാറ്റിൽ ഏറ്റവും കൂടുതൽ സിക്സ് നേടിയ താരമായിരിക്കുകയാണ്. ഷാഹിദ് അഫ്രീദിയുടെ 351 സിക്‌സറുകൾ എന്ന നേട്ടത്തെ മറികടന്ന രോഹിത്തിന്റെ പേരിൽ ഇപ്പോൾ 352 സിക്സുകൾ ഉണ്ട്.

തന്റെ ശ്രദ്ധേയമായ കരിയറിൽ, പവർ-ഹിറ്ററായി അറിയപ്പെടുന്ന രോഹിത് മൂന്ന് ഫോർമാറ്റുകളിലും നിരവധി സിക്‌സറുകൾ നേടിയിട്ടുണ്ട്. എന്നിരുന്നാലും, ഏകദിനങ്ങളിലേക്ക് വന്നാൽ അവിടെ രോഹിത്തിന്റെ സിക്സ് ഹിറ്റിങ് കഴിവിന്റെ മറ്റൊരു തലം നമുക്ക് കാണാൻ സാധിക്കും. 276 മത്സരങ്ങളിൽ നിന്ന് അദ്ദേഹമാകെ 11,427 റൺസ് നേടിയിട്ടുണ്ട്. 350 മത്സരങ്ങളിൽ നിന്ന് 229 സിക്‌സറുകളുമായി എംഎസ് ധോണിയാണ് ഇന്ത്യക്കാരിൽ ഈ ലിസ്റ്റിൽ രണ്ടാം സ്ഥാനത്ത്.

ഇന്നത്തെ മത്സരത്തിലേക്ക് വന്നാൽ ടോസ് നഷ്ടപ്പെട്ട് ആദ്യം ബാറ്റ് ചെയ്ത ഇന്ത്യ മികച്ച സ്കോറിലേക്ക് നീങ്ങുകയാണ്. ഒടുവിൽ വിവരും കിട്ടുമ്പോൾ ടീം 200-4 എന്ന നിലയിലാണ്. ഓപ്പണർ ജയ്‌സ്വാളിന്റെ വിക്കറ്റ് തുടക്കത്തിലേ നഷ്ടമായ ശേഷം ഇന്ത്യൻ ഇന്നിംഗ്‌സിനെ മുന്നോട്ട് കൊണ്ടുപോയത് രോഹിത്- കോഹ്‌ലി സഖ്യത്തിന്റെ മികച്ച ബാറ്റിംഗ് ആയിരുന്നു. ഇരുവരും ചേർന്നുള്ള 136 റൺ കൂട്ടുകെട്ട് ടീം സ്കോർ കുതിക്കാൻ കാരണമായി.

യദേഷ്ടം റൺ സ്കോർ ചെയ്ത ഇരുവരും ബൗണ്ടറികളും സിക്‌സും ഒകെ അടിച്ച് കാണികൾക്ക് വിരുന്നൊരുക്കി. അതിനിടയിലാണ് ജാൻസന്റെ പന്തിൽ വിക്കറ്റിന് മുന്നിൽ കുടുങ്ങി രോഹിത് മടങ്ങിയത്. 51 പന്തിൽ 5 ബൗണ്ടറിയും 3 സിക്സുമൊക്കെ നേടി 57 റൺസ് നേടിയിരുന്നു.

ഏകദിനത്തിൽ ഏറ്റവും കൂടുതൽ സിക്സറുകൾ നേടിയ കളിക്കാർ-

1. . രോഹിത് ശർമ്മ (ഇന്ത്യ) – 352 സിക്സറുകൾ

2 ഷാഹിദ് അഫ്രീദി (പാകിസ്ഥാൻ) – 351 സിക്സറുകൾ

3. ക്രിസ് ഗെയ്ൽ (വെസ്റ്റ് ഇൻഡീസ്) – 331 സിക്സറുകൾ

4. സനത് ജയസൂര്യ (ശ്രീലങ്ക) – 270 സിക്സറുകൾ

5. എംഎസ് ധോണി (ഇന്ത്യ) – 229 സിക്സറുകൾ