ന്യൂഡൽഹി : വോട്ടർ പട്ടിക പരിഷ്കരണത്തിനുള്ള സ്പെഷ്യൽ ഇന്റൻസീവ് റിവിഷൻ (എസ്ഐആർ) സമയപരിധി നീട്ടി. നേരത്തെ നൽകിയിരുന്ന ഡിസംബർ 4 എന്ന സമയപരിധി നീട്ടി തിരഞ്ഞെടുപ്പ് കമ്മീഷൻ ഉത്തരവിട്ടു. പുതിയ ഉത്തരവ് പ്രകാരം എസ്ഐആർ പ്രക്രിയ ഡിസംബർ 11 ന് അവസാനിക്കുകയും കരട് വോട്ടർ പട്ടിക ഡിസംബർ 16 ന് പ്രസിദ്ധീകരിക്കുകയും ചെയ്യുന്നതാണ്. തുടർന്ന് ഫെബ്രുവരി 14 ന് അന്തിമ വോട്ടർ പട്ടിക പ്രസിദ്ധീകരിക്കും.
ബിഎൽഒമാർ നേരിടുന്ന ജോലി സമ്മർദ്ദത്തെ കണക്കിലെടുത്താണ് തിരഞ്ഞെടുപ്പ് കമ്മീഷൻ എസ്ഐആർ നടപടി പൂർത്തീകരണത്തിനുള്ള സമയപരിധി നീട്ടിയിരിക്കുന്നത്. നേരത്തെ ബിഎൽഒമാരുടെയും സൂപ്പർവൈസർമാരുടെയും വേതനം ഇരട്ടിപ്പിക്കാനും തിരഞ്ഞെടുപ്പ് കമ്മീഷൻ തീരുമാനമെടുത്തിരുന്നു.
ഇന്ത്യൻ തിരഞ്ഞെടുപ്പ് കമ്മീഷന്റെ നേതൃത്വത്തിൽ 12 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി നടത്തുന്ന വോട്ടർ പട്ടികയുടെ പ്രത്യേക തീവ്രമായ പുനഃപരിശോധനയുടെ രണ്ടാം ഘട്ടത്തിനാണ് സമയപരിധി നീട്ടി നൽകിയിരിക്കുന്നത്. ആൻഡമാൻ നിക്കോബാർ ദ്വീപുകൾ, ഛത്തീസ്ഗഢ്, ഗോവ, ഗുജറാത്ത്, കേരളം, ലക്ഷദ്വീപ്, മധ്യപ്രദേശ്, പുതുച്ചേരി, രാജസ്ഥാൻ, തമിഴ്‌നാട്, ഉത്തർപ്രദേശ്, പശ്ചിമ ബംഗാൾ എന്നിവിടങ്ങളിലാണ് നിലവിൽ എസ്ഐആർ നടപടികൾ പുരോഗമിക്കുന്നത്.
Discussion about this post