നൈജീരിയയിൽ മതസ്വാതന്ത്ര്യം ഉറപ്പാക്കും; ക്രിസ്മസ് ദിനത്തിൽ പ്രതിജ്ഞയുമായി പ്രസിഡന്റ് ബോല ടിനുബു

അബൂജ: നൈജീരിയയിൽ മതസ്വാതന്ത്ര്യം സംരക്ഷിക്കുമെന്നും എല്ലാ വിശ്വാസികൾക്കും സുരക്ഷിതമായി ജീവിക്കാനുള്ള സാഹചര്യം ഉറപ്പാക്കുമെന്നും പ്രസിഡന്റ് ബോല ടിനുബു. ക്രിസ്മസ് ദിനത്തിൽ രാജ്യത്തെ അഭിസംബോധന ചെയ്ത് പുറത്തിറക്കിയ സന്ദേശത്തിലാണ് അദ്ദേഹം ഇക്കാര്യം വ്യക്തമാക്കിയത്. ഭീകരവാദികൾ ക്രിസ്ത്യാനികളെ മാത്രം ലക്ഷ്യം വെക്കുന്നുവെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ ആരോപണങ്ങൾക്കിടയിലാണ് നൈജീരിയൻ പ്രസിഡന്റിന്റെ ഈ പ്രസ്താവന എന്നതും ശ്രദ്ധേയമാണ്.

മതത്തിന്റെ പേരിലോ വംശത്തിന്റെ പേരിലോ ആരും വിവേചനം അനുഭവിക്കാൻ പാടില്ലെന്ന് ടിനുബു പറഞ്ഞു. “നിങ്ങളുടെ പ്രസിഡന്റ് എന്ന നിലയിൽ, നൈജീരിയയിൽ മതസ്വാതന്ത്ര്യം ഉറപ്പാക്കുന്നതിനും വ്യത്യസ്ത മതങ്ങളിലുള്ള എല്ലാ ആളുകളെയും അക്രമത്തിൽ നിന്ന് സംരക്ഷിക്കുന്നതിനും എന്റെ കഴിവിന്റെ പരമാവധി ചെയ്യാൻ ഞാൻ പ്രതിജ്ഞാബദ്ധനാണ്,” അദ്ദേഹം കത്തിൽ കുറിച്ചു.

2023-ൽ അധികാരമേറ്റത് മുതൽ രാജ്യത്തിന്റെ സുരക്ഷയ്ക്കും സ്ഥിരതയ്ക്കും വേണ്ടിയാണ് തന്റെ സർക്കാർ നിലകൊള്ളുന്നതെന്നും അദ്ദേഹം കൂട്ടിച്ചേർത്തു. ഓരോ പൗരനും ഭയമില്ലാതെ ആരാധന നടത്താനും ജീവിക്കാനുമുള്ള അവകാശം ഭരണഘടന ഉറപ്പുനൽകുന്നുണ്ടെന്ന് അദ്ദേഹം ഓർമ്മിപ്പിച്ചു. നൈജീരിയയിൽ ക്രിസ്ത്യാനികൾ ആസൂത്രിതമായി പീഡിപ്പിക്കപ്പെടുന്നു എന്ന ട്രംപിന്റെയും ചില അന്താരാഷ്ട്ര സംഘടനകളുടെയും വാദത്തെ നൈജീരിയൻ സർക്കാർ ഔദ്യോഗികമായി തള്ളി. രാജ്യത്തെ സുരക്ഷാ സാഹചര്യം സങ്കീർണ്ണമാണെന്നും സായുധ സംഘങ്ങൾ മുസ്ലീങ്ങളെയും ക്രിസ്ത്യാനികളെയും ഒരുപോലെ ലക്ഷ്യമിടുന്നുണ്ടെന്നുമാണ് സർക്കാരിന്റെ നിലപാട്.

ക്രിസ്ത്യാനികൾക്ക് നേരെയുള്ള അക്രമം എന്ന് ഇതിനെ ചുരുക്കിക്കാണുന്നത് യാഥാർത്ഥ്യങ്ങളെ ലഘൂകരിക്കുന്നതിന് തുല്യമാണെന്നും അധികൃതർ ചൂണ്ടിക്കാട്ടി. വടക്കൻ നൈജീരിയയിൽ മുസ്ലീങ്ങളും തെക്ക് ഭാഗത്ത് ക്രിസ്ത്യാനികളും ഭൂരിപക്ഷമായതിനാൽ അക്രമങ്ങൾ പലപ്പോഴും വർഗ്ഗീയമായി ചിത്രീകരിക്കപ്പെടുകയാണെന്നും സർക്കാർ വാദിക്കുന്നു.

നൈജീരിയയിൽ ക്രിസ്ത്യാനികളെ കൊലപ്പെടുത്തുന്നുവെന്ന് ആരോപിച്ച് യുഎസ് സൈന്യം കഴിഞ്ഞ ദിവസം ഐഎസ് കേന്ദ്രങ്ങളിൽ വ്യോമാക്രമണം നടത്തിയിരുന്നു. ഭീകരവാദത്തിനെതിരായ പോരാട്ടത്തിൽ അമേരിക്കയുമായി സഹകരിക്കുമെന്ന് വ്യക്തമാക്കുമ്പോഴും, അക്രമങ്ങളെ മതപരമായ കണ്ണിലൂടെ മാത്രം കാണുന്നതിനോട് നൈജീരിയയ്ക്ക് വിയോജിപ്പുണ്ട്. ഐക്യവും മതസൗഹാർദ്ദവുമാണ് രാജ്യത്തിന്റെ മുന്നോട്ടുള്ള പ്രയാണത്തിന് അത്യാവശ്യമെന്ന് ടിനുബു തന്റെ ക്രിസ്മസ് സന്ദേശത്തിൽ ഊന്നിപ്പറഞ്ഞു.