ഇറാന്റെ പരമോന്നത നേതാവ് ആയത്തുള്ള അലി ഖമേനിയുടെ മകനും പിൻഗാമിയുമാകാൻ സാധ്യതയുള്ള മോജ്തബ ഖമേനിക്ക് ഇസ്രായേൽ ആക്രമണത്തിൽ ഗുരുതരമായി പരിക്കേറ്റതായി റിപ്പോർട്ട്. കഴിഞ്ഞ മാസം ഇറാൻ ലക്ഷ്യമിട്ട് ഇസ്രായേൽ നടത്തിയ വ്യോമാക്രമണത്തിലാണ് മോജ്തബയ്ക്ക് പരിക്കേറ്റതെന്നാണ് പുറത്തുവരുന്ന വിവരം. അദ്ദേഹം കൊല്ലപ്പെട്ടുവെന്ന തരത്തിൽ നേരത്തെ അഭ്യൂഹങ്ങൾ പരന്നിരുന്നെങ്കിലും, മോജ്തബ ജീവനോടെയുണ്ടെന്ന് വിവിധ അന്താരാഷ്ട്ര രഹസ്യാന്വേഷണ ഏജൻസികൾ വ്യക്തമാക്കുന്നു.
ആക്രമണം ഒക്ടോബർ 26-ന്? ഒക്ടോബർ 26-ന് ഇറാനിലെ സൈനിക കേന്ദ്രങ്ങൾ ലക്ഷ്യമിട്ട് ഇസ്രായേൽ നടത്തിയ അതിശക്തമായ മിസൈൽ ആക്രമണത്തിനിടെയാണ് മോജ്തബ ഖമേനിക്ക് പരിക്കേറ്റതെന്നാണ് സൂചന. ഇറാന്റെ പക്കലുള്ള അത്യാധുനിക പ്രതിരോധ സംവിധാനങ്ങളെ തകർത്തുകൊണ്ട് നടത്തിയ ഈ ഓപ്പറേഷനിൽ മോജ്തബ ഉൾപ്പെടെയുള്ള ഉന്നതർ ലക്ഷ്യസ്ഥാനത്തായിരുന്നുവെന്ന് കരുതപ്പെടുന്നു. പരിക്കേറ്റതിനെ തുടർന്ന് അദ്ദേഹം നിലവിൽ നിരീക്ഷണത്തിലാണെന്നും ആരോഗ്യനില സംബന്ധിച്ച വിവരങ്ങൾ അതീവ രഹസ്യമായാണ് ഇറാൻ സൂക്ഷിക്കുന്നതെന്നും റിപ്പോർട്ടുകളുണ്ട്.
പിൻഗാമി ചർച്ചകൾക്കിടെ ആശങ്ക 85-കാരനായ അലി ഖമേനിയുടെ ആരോഗ്യനില വഷളായതിനെത്തുടർന്ന്, ഇറാന്റെ അടുത്ത പരമോന്നത നേതാവായി മോജ്തബയെ നിയമിക്കാനുള്ള നീക്കങ്ങൾ നടക്കുകയായിരുന്നു. ഖമേനിയുടെ രണ്ടാമത്തെ മകനായ മോജ്തബയ്ക്ക് ഇറാന്റെ സൈനിക വിഭാഗമായ റെവല്യൂഷണറി ഗാർഡിൽ വലിയ സ്വാധീനമുണ്ട്. ഈ നിർണ്ണായക ഘട്ടത്തിൽ മോജ്തബയ്ക്ക് പരിക്കേറ്റത് ഇറാന്റെ ആഭ്യന്തര രാഷ്ട്രീയത്തിലും വലിയ ചലനങ്ങൾ ഉണ്ടാക്കിയിട്ടുണ്ട്.
ഇറാൻ പ്രതികരിക്കുന്നില്ല തങ്ങളുടെ ഭാവി നേതാവിനെക്കുറിച്ചുള്ള ഇത്തരം റിപ്പോർട്ടുകളോട് ഇറാൻ ഭരണകൂടം ഔദ്യോഗികമായി ഇതുവരെ പ്രതികരിച്ചിട്ടില്ല. മുൻപ് ഹിസ്ബുള്ള തലവൻ ഹസ്സൻ നസ്റള്ളയുടെ കൊലപാതകത്തിന് പിന്നാലെ ഇറാന്റെ ഖുദ്സ് ഫോഴ്സ് തലവൻ ഇസ്മായിൽ ഖാനിയെ കാണാതായപ്പോഴും ഇറാൻ സമാനമായ മൗനം പാലിച്ചിരുന്നു. എന്നാൽ മോജ്തബ കൊല്ലപ്പെട്ടിട്ടില്ലെന്നും ചികിത്സയിലാണെന്നുമുള്ള റിപ്പോർട്ടുകളാണ് ഇപ്പോൾ ശക്തമാകുന്നത്.
