പട്ന : ബീഹാറിൽ നിർണായക തീരുമാനവുമായി ജ്വല്ലറി ഉടമകൾ. ജ്വല്ലറികളിൽ ഹിജാബിനും ബുർഖക്കും നിരോധനം ഏർപ്പെടുത്തി. സുരക്ഷാകാരണങ്ങൾ ചൂണ്ടിക്കാട്ടിയാണ് തീരുമാനം. കൂടാതെ ഉപഭോക്താക്കൾക്ക് തിരിച്ചറിയൽ കാർഡും നിർബന്ധമാക്കിയിട്ടുണ്ട്. കുറച്ച് ദിവസങ്ങൾക്ക് മുമ്പ്, ഉത്തർപ്രദേശിലെ ഝാൻസിയിലെ ആഭരണ വ്യാപാരികളും സമാനമായ ഒരു തീരുമാനം എടുത്തിരുന്നു.
ഹിജാബും ബുർഖയും ധരിച്ചുകൊണ്ട് ജ്വല്ലറികൾ കേന്ദ്രീകരിച്ച് മോഷണങ്ങൾ വർദ്ധിച്ചതോടെയാണ് ഓൾ ഇന്ത്യ ജ്വല്ലേഴ്സ് ഫെഡറേഷൻ ബീഹാറിൽ ഇത്തരമൊരു നിരോധനം ഏർപ്പെടുത്തിയിരിക്കുന്നത്. സംസ്ഥാനത്തുടനീളമുള്ള സ്വർണ്ണ വ്യാപാരികൾ കടകളിൽ പ്രവേശിക്കുന്നതിന് മുമ്പ് ഉപഭോക്താക്കൾ മുഖം മൂടുന്ന വസ്ത്രങ്ങളും മാസ്ക്കുകളും നീക്കം ചെയ്യണമെന്ന് പ്രസ്താവിക്കുന്ന നോട്ടീസുകൾ സ്ഥാപിച്ചിട്ടുണ്ട്.
സംസ്ഥാനത്തുടനീളമുള്ള ജില്ലാ പ്രസിഡന്റുമാരുമായി നടത്തിയ കൂടിക്കാഴ്ചയ്ക്ക് ശേഷമാണ് ഈ തീരുമാനമെടുത്തതെന്ന് ഓൾ ഇന്ത്യ ജ്വല്ലേഴ്സ് ആൻഡ് ഗോൾഡ്സ്മിത്ത് ഫെഡറേഷന്റെ ബീഹാർ പ്രസിഡന്റ് അശോക് കുമാർ വർമ്മ പറഞ്ഞു. സ്വർണ്ണത്തിന്റെയും വെള്ളിയുടെയും റെക്കോർഡ് ഉയർന്ന വില കാരണം സുരക്ഷാ അപകടസാധ്യതകൾ വർദ്ധിച്ചിട്ടുണ്ടെന്നും അദ്ദേഹം വിശദീകരിച്ചു.
