രാജ്യം ഏറെ ആകാംക്ഷയോടെ കാത്തിരിക്കുന്ന 2026-ലെ കേന്ദ്ര ബജറ്റ് അവതരണത്തിന് മണിക്കൂറുകൾ മാത്രം ബാക്കിനിൽക്കെ സ്വർണ-വെള്ളി വിലയിൽ വൻ ഇടിവ്. ആഗോള വിപണിയിലുണ്ടായ അപ്രതീക്ഷിത തിരിച്ചടിയെത്തുടർന്ന് ആഭ്യന്തര വിപണിയിലും സ്വർണവില കൂപ്പുകുത്തി. മൾട്ടി കമ്മോഡിറ്റി എക്സ്ചേഞ്ചിൽ (MCX) സ്വർണത്തിന് പത്തുഗ്രാമിന് ഒമ്പത് ശതമാനത്തോളം വില കുറഞ്ഞു. സ്വർണത്തിന് പിന്നാലെ വെള്ളി വിലയിലും വലിയ ഇടിവാണ് രേഖപ്പെടുത്തിയിരിക്കുന്നത്. ബജറ്റിൽ സ്വർണത്തിന്റെ ഇറക്കുമതി തീരുവ (Import Duty) കുറച്ചേക്കുമെന്ന അഭ്യൂഹങ്ങൾക്കിടയിലാണ് വിപണിയെ ഞെട്ടിച്ചുകൊണ്ട് ഈ വിലത്തകർച്ച ഉണ്ടായിരിക്കുന്നത്.
എംസിഎക്സിൽ 10 ഗ്രാം സ്വർണത്തിന് 13,711 രൂപ കുറഞ്ഞ് 1,38,634 രൂപയിലെത്തി. വെള്ളിയുടെ വില കിലോയ്ക്ക് 26,273 രൂപ ഇടിഞ്ഞ് 2,65,652 രൂപയിലുമാണ് വ്യാപാരം നടക്കുന്നത്. വെള്ളിയാഴ്ച ആഗോള വിപണിയിൽ സ്വർണവിലയിൽ 12 ശതമാനവും വെള്ളിയിൽ 37 ശതമാനവും ഇടിവ് രേഖപ്പെടുത്തിയിരുന്നു. എൺപതുകൾക്ക് ശേഷമുള്ള ഏറ്റവും വലിയ ഏകദിന തകർച്ചയാണിതെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു. ഇതാദ്യമായാണ് ബജറ്റ് ദിനമായ ഞായറാഴ്ച ഓഹരി വിപണിയും കമ്മോഡിറ്റി വിപണിയും ഈ അസാധാരണ സാഹചര്യം നേരിടാൻ പ്രത്യേകമായി തുറന്ന് പ്രവർത്തിക്കുന്നത്.
നിലവിൽ ഒമ്പത് ശതമാനത്തോളം വരുന്ന സ്വർണത്തിന്റെ ഇറക്കുമതി തീരുവ ആറ് ശതമാനത്തിൽ നിന്ന് നാല് ശതമാനമായി ധനമന്ത്രി നിർമ്മല സീതാരാമൻ കുറച്ചേക്കുമെന്നാണ് ജ്വല്ലറി വ്യാപാരികളുടെയും നിക്ഷേപകരുടെയും പ്രതീക്ഷ. അങ്ങനെയുണ്ടായാൽ പവൻ വിലയിൽ ഇനിയും മൂവായിരം രൂപ വരെ കുറയാൻ സാധ്യതയുണ്ട്. എന്നാൽ വിപണിയിൽ നിലനിൽക്കുന്ന അമിതമായ ചാഞ്ചാട്ടം നിക്ഷേപകരെ ആശങ്കയിലാക്കുന്നുണ്ട്. അമേരിക്കൻ ഡോളർ ശക്തിപ്രാപിച്ചതും ആഗോള തലത്തിൽ നിക്ഷേപകർ ലാഭമെടുപ്പിലേക്ക് കടന്നതുമാണ് സ്വർണത്തിന് തിരിച്ചടിയായതെന്നാണ് വിലയിരുത്തൽ.
നിർമ്മല സീതാരാമന്റെ തുടർച്ചയായ ഒമ്പതാമത്തെ ബജറ്റ് അവതരണമാണിത്. സ്വർണവിലയിലെ ഇടിവ് സാധാരണക്കാരായ ഉപഭോക്താക്കൾക്ക് വലിയ ആശ്വാസമാകുമെങ്കിലും നിക്ഷേപകർക്കും ജ്വല്ലറി ഉടമകൾക്കും ഇത് വലിയ ആഘാതമാണ് സൃഷ്ടിച്ചിരിക്കുന്നത്. ബജറ്റ് പ്രഖ്യാപനങ്ങൾ വരുന്നതോടെ വിപണിയിൽ കൂടുതൽ വ്യക്തത ലഭിക്കുമെന്ന പ്രതീക്ഷയിലാണ് വ്യാപാര ലോകം. ആഗോള വിപണിയിലെ മാറ്റങ്ങൾക്കൊപ്പം കേന്ദ്ര സർക്കാരിന്റെ നികുതി നയങ്ങൾ കൂടി പുറത്തുവരുന്നതോടെ സ്വർണവിലയുടെ ഭാവി നിർണ്ണയിക്കപ്പെടും.
Discussion about this post