ന്യൂഡൽഹി : കർഷകരുടെ വരുമാനം വർദ്ധിപ്പിക്കാനും, പുതിയ തൊഴിലവസരങ്ങൾ സൃഷ്ടിക്കാനും സാധ്യമാക്കുന്ന വിവിധ പദ്ധതികൾ പ്രഖ്യാപിച്ച് കേന്ദ്ര ബജറ്റ്. കർഷകർ, കന്നുകാലി കർഷകർ, ഗ്രാമീണർ എന്നിവർക്കായി ബജറ്റിൽ നിരവധി പ്രഖ്യാപനങ്ങൾ ഉൾപ്പെടുത്തിയിട്ടുണ്ട്. മൃഗസംരക്ഷണ മേഖലയ്ക്കായി വായ്പാധിഷ്ഠിത സബ്സിഡി പദ്ധതികൾ ആരംഭിക്കും.
കന്നുകാലി സംരംഭങ്ങളെ പ്രോത്സാഹിപ്പിക്കുകയും ആധുനികവൽക്കരിക്കുകയും ചെയ്യും. കന്നുകാലി കർഷക ഉൽപാദക സംഘടനകളെ പ്രോത്സാഹിപ്പിക്കുമെന്നും ബജറ്റിൽ പറയുന്നു. കന്നുകാലി കർഷക ഉൽപാദക സംഘടനകളെ തൊഴിലവസരങ്ങൾ പ്രോത്സാഹിപ്പിക്കുന്നതിന് ക്രെഡിറ്റ്-ലിങ്ക്ഡ് സബ്സിഡി പ്രോഗ്രാമും പ്രഖ്യാപിച്ചിട്ടുണ്ട്.
തീരദേശ പ്രദേശങ്ങളിലെ തെങ്ങ്, ചന്ദനം, കശുമാവ് തുടങ്ങിയ വിളകൾക്ക് പിന്തുണ നൽകും. നാളികേര ഉൽപാദനത്തിൽ മത്സരം വർദ്ധിപ്പിക്കുന്നതിനായി ഒരു നാളികേര പ്രോത്സാഹന പദ്ധതി അവതരിപ്പിക്കും.
ഇന്ത്യൻ കശുവണ്ടി, കൊക്കോ എന്നിവയ്ക്കായി പ്രത്യേക പരിപാടികൾ ആരംഭിക്കുകയും അവയെ ആഗോള ബ്രാൻഡുകളായി വികസിപ്പിക്കാനുള്ള ശ്രമങ്ങൾ നടത്തുകയും ചെയ്യും. ഇന്ത്യയുടെ സാമൂഹിക, സാംസ്കാരിക പൈതൃകവുമായി അടുത്ത ബന്ധമുള്ള ചന്ദനത്തിന് അതിന്റെ പൈതൃകവും സാമ്പത്തിക സാധ്യതകളും സംരക്ഷിക്കുന്നതിനും പ്രോത്സാഹിപ്പിക്കുന്നതിനുമുള്ള ശ്രമങ്ങളുടെ ഭാഗമായി ശ്രദ്ധ കേന്ദ്രീകരിക്കും. ചന്ദനത്തടി ആവാസവ്യവസ്ഥയുടെ മഹത്വം പുനഃസ്ഥാപിക്കുന്നതിന് കേന്ദ്രം സംസ്ഥാനങ്ങളുമായി സഹകരിക്കുമെന്നും ധനമന്ത്രി വ്യക്തമാക്കി. കൂടാതെ കാർഷിക വിഭവ ശേഖരം സംയോജിപ്പിക്കുന്നതിനുള്ള ബഹുഭാഷാ AI ഉപകരണമായ ‘ഭാരത് വിസ്താർ’ ആരംഭിക്കുന്നതായും ധനമന്ത്രി ബജറ്റ് പ്രഖ്യാപന വേളയിൽ അറിയിച്ചു.
Discussion about this post