ന്യൂഡൽഹി : 2026 ലെ കേന്ദ്ര ബജറ്റിൽ പ്രതിരോധ ഫണ്ട് ഗണ്യമായി വർദ്ധിപ്പിച്ച് കേന്ദ്ര സർക്കാർ. മുൻവർഷത്തെ അപേക്ഷിച്ച് 15 ശതമാനം വർധനവ് ആണ് പ്രഖ്യാപിച്ചിട്ടുള്ളത്. പ്രതിരോധ മേഖലയ്ക്കായി 7.85 ലക്ഷം കോടി രൂപയാണ് ഇന്ന് ധനമന്ത്രി നിർമ്മലാ സീതാരാമൻ അവതരിപ്പിച്ച ബജറ്റിൽ വകയിരുത്തിയിട്ടുള്ളത്. കഴിഞ്ഞ വർഷത്തെ 6.81 ലക്ഷം കോടി രൂപയിൽ നിന്ന് ഇത് ശ്രദ്ധേയമായ വർദ്ധനവാണ്. റാഫേൽ യുദ്ധവിമാനങ്ങൾ, അന്തർവാഹിനികൾ, നൂതന ആളില്ലാ ആകാശ വാഹനങ്ങൾ എന്നിവയ്ക്കുള്ള വരാനിരിക്കുന്ന കരാറുകൾ ഉൾപ്പെടെയുള്ള പ്രധാന സംഭരണ പരിപാടികൾ ലക്ഷ്യം വച്ചാണ് പ്രതിരോധ ബജറ്റ് വർദ്ധിപ്പിച്ചിരിക്കുന്നത്.
2.19 ലക്ഷം കോടി രൂപ സായുധ സേനയുടെ നവീകരണത്തിനായി (മൂലധന വിഹിതം) നീക്കിവച്ചിട്ടുണ്ട്. മൂലധന വിഹിതം കഴിഞ്ഞ വർഷത്തെ 1.80 ലക്ഷം കോടിയിൽ നിന്ന് 21.84 ശതമാനം വർദ്ധിപ്പിച്ചാണ് 2.19 ലക്ഷം കോടി രൂപയായി മാറ്റിയിട്ടുള്ളത്. പ്രതിരോധ പെൻഷനുള്ള തുകയും സർക്കാർ വർദ്ധിപ്പിച്ചു. 1,71,338.22 കോടി രൂപയാണ് പ്രതിരോധ പെൻഷൻ ആയി ബജറ്റിൽ അനുവദിച്ചിട്ടുള്ളത്. ഇത് മുൻ സൈനികർക്കും അവരുടെ കുടുംബങ്ങൾക്കും ആശ്വാസം നൽകുന്നതാണ്.
Discussion about this post