തിരുവനന്തപുരം ഗ്രീൻഫീൽഡ് സ്റ്റേഡിയത്തിൽ ന്യൂസിലൻഡിനെതിരെ ഇന്ത്യ നേടിയ തകർപ്പൻ വിജയത്തിന് പിന്നാലെ, മലയാളി താരം സഞ്ജു സാംസണിന്റെ ഫോമില്ലായ്മയെക്കുറിച്ച് ശശി തരൂർ എംപി നടത്തിയ പ്രതികരണം ശ്രദ്ധേയമാകുന്നു. സഞ്ജുവിന് നിർഭാഗ്യത്തിന്റെ കാലമാണെന്ന് വ്യക്തമാക്കിയ അദ്ദേഹം, ഇഷാൻ കിഷന്റെ ഫോമിനെ പ്രശംസിക്കാനും മറന്നില്ല.
സ്വന്തം നാട്ടിലെ കാണികൾക്ക് മുന്നിൽ തിളങ്ങാൻ സഞ്ജുവിന് കഴിയാത്തത് നിർഭാഗ്യം കൊണ്ടാണെന്ന് അദ്ദേഹം പറഞ്ഞു. അഞ്ച് ഇന്നിംഗ്സുകളിൽ നിന്ന് വെറും 46 റൺസ് മാത്രമാണ് സഞ്ജുവിന് ഈ പരമ്പരയിൽ നേടാനായത്. സഞ്ജു ഫോമിലല്ലെങ്കിലും ഇഷാൻ കിഷൻ മികച്ച ഫോമിലാണെന്ന് തരൂർ ചൂണ്ടിക്കാട്ടി. 43 പന്തിൽ നിന്ന് 103 റൺസ് നേടിയ ഇഷാന്റെ ഇന്നിംഗ്സ് അതിശയിപ്പിക്കുന്നതായിരുന്നുവെന്നും അദ്ദേഹം കൂട്ടിച്ചേർത്തു.
ഈ മത്സരത്തിൽ ഇന്ത്യ നേടിയ റെക്കോർഡ് സ്കോറും (271/5) സിക്സറുകളുടെ പെരുമഴയും ലോകകപ്പിന് മുന്നോടിയായി ടീം മികച്ച ഫോമിലാണെന്ന് തെളിയിക്കുന്നതായി തരൂർ അഭിപ്രായപ്പെട്ടു.ആദ്യ ഇന്നിംഗ്സിൽ 23 സിക്സറുകളുടെ അകമ്പടിയോടെ ഇന്ത്യ പടുത്തുയർത്തിയത് ടി20 ചരിത്രത്തിലെ തങ്ങളുടെ മൂന്നാമത്തെ ഉയർന്ന സ്കോറാണ്.
272 റൺസ് ലക്ഷ്യവുമായി ഇറങ്ങിയ ന്യൂസിലൻഡിനെ 225 റൺസിന് പുറത്താക്കി ഇന്ത്യ 46 റൺസിന്റെ വിജയം ആഘോഷിച്ചു.
Discussion about this post