വന്നാലും വന്നില്ലെങ്കിലും ഇന്ത്യ ജയിക്കും, പാകിസ്ഥാന്റെ ബഹിഷ്കരണ നാടകങ്ങളെ പൊളിച്ചടുക്കി ശ്രീകാന്ത്

2026 ടി20 ലോകകപ്പിൽ ഇന്ത്യക്കെതിരായ മത്സരം ബഹിഷ്കരിക്കാനുള്ള പാകിസ്ഥാന്റെ തീരുമാനത്തിനെതിരെ രൂക്ഷമായ ഭാഷയിൽ പ്രതികരിച്ച് മുൻ ഇന്ത്യൻ നായകൻ കൃഷ്ണമാചാരി ശ്രീകാന്ത്. പാകിസ്ഥാൻ വരുന്നത് കൊണ്ട് പ്രത്യേകിച്ചൊന്നും സംഭവിക്കാനില്ലെന്നും, അവർ കളിച്ചാലും ഇല്ലെങ്കിലും ഇന്ത്യക്ക് ആ മത്സരം ഒരു ‘വാക്കോവർ’  ആയിരിക്കുമെന്നും അദ്ദേഹം പരിഹസിച്ചു.

തന്റെ യൂട്യൂബ് ചാനലായ ‘ചീക്കി ചീക’യിൽ സംസാരിക്കവെയാണ് ശ്രീകാന്ത് പാക് നിലപാടിനെ പരിഹസിച്ചത്. “Empty vessels make more noise. പാകിസ്ഥാൻ ഭയന്നിരിക്കുകയാണ്. അണ്ടർ-19 ലോകകപ്പിലും അവർ തോറ്റു. അതുകൊണ്ട് ഇന്ത്യക്ക് വാക്കോവർ നൽകുന്നതിനെക്കുറിച്ചാണ് അവർ ചിന്തിക്കുന്നത്. അവർ വന്നാലും ഇല്ലെങ്കിലും ഇന്ത്യക്ക് അതൊരു വാക്കോവർ മാത്രമാണ്. ഏഷ്യാ കപ്പിൽ അവർ ഇന്ത്യക്കെതിരെ എല്ലാ കളികളും കളിച്ചല്ലോ, പിന്നെന്തിനാണ് ഇപ്പോൾ ഈ പേടി?” – ശ്രീകാന്ത് ചോദിച്ചു.”

2026 ടി20 ലോകകപ്പിൽ പങ്കെടുക്കാൻ പാക് സർക്കാർ അനുമതി നൽകിയെങ്കിലും, ഗ്രൂപ്പ് ഘട്ടത്തിൽ ഇന്ത്യക്കെതിരായ മത്സരം ബഹിഷ്കരിക്കാനാണ് പാകിസ്ഥാൻ തീരുമാനിച്ചിരിക്കുന്നത്. ഫെബ്രുവരി 15 ഞായറാഴ്ച കൊളംബോയിലാണ് ഈ ഹൈ-വോൾട്ടേജ് പോരാട്ടം നടക്കേണ്ടത്.

ടി20 ലോകകപ്പുകളിൽ ഇന്ത്യയും പാകിസ്ഥാനും ഇതുവരെ എട്ട് തവണ ഏറ്റുമുട്ടിയിട്ടുണ്ട്. ഇതിൽ ഏഴ് തവണയും ഇന്ത്യയാണ് വിജയിച്ചത്. 2007 , ഗ്രൂപ്പ് ഘട്ടത്തിൽ ബോൾ-ഔട്ടിലൂടെയും ഫൈനലിൽ 5 റൺസിനും ഇന്ത്യ ജയിച്ചു. ശേഷം 2012, 2014, 2016 വർഷങ്ങളിൽ ഇന്ത്യ ആധികാരികമായി വിജയിച്ചു. അതിനിടയിൽ 2021 ൽ പാകിസ്ഥാൻ 10 വിക്കറ്റിന് വിജയിച്ചു