ഇന്ത്യൻ ഐടി ഭീമന്മാരായ ഇൻഫോസിസ്, ടിസിഎസ് (TCS), വിപ്രോ എന്നിവർ ആർട്ടിഫിഷ്യൽ ഇന്റലിജൻസ് (AI) തരംഗത്തെ ഭയക്കുമ്പോൾ, 11 വർഷം മുൻപ് ഇൻഫോസിസിന് മുന്നിലുണ്ടായിരുന്ന സുവർണ്ണാവസരം വെളിപ്പെടുത്തി മുൻ സിഇഒ വിശാൽ സിക്ക. ഡൽഹിയിൽ നടന്ന ഇന്ത്യ ടുഡേ എഐ സമിറ്റ് 2026-ൽ സംസാരിക്കവെയാണ്, ഇന്നത്തെ ലോകത്തെ വിറപ്പിക്കുന്ന ഓപ്പൺ എഐ (OpenAI) എന്ന കമ്പനിയിൽ ഇൻഫോസിസ് നിക്ഷേപം നടത്തിയിരുന്ന കാര്യം അദ്ദേഹം ഓർമ്മിപ്പിച്ചത്. അന്ന് താൻ വിഭാവനം ചെയ്ത പാതയിലൂടെ ഇൻഫോസിസ് സഞ്ചരിച്ചിരുന്നെങ്കിൽ ഇന്ന് എഐ ലോകത്തെ മുൻനിരക്കാരായി കമ്പനി മാറുമായിരുന്നുവെന്ന് സിക്ക പറഞ്ഞു.
2015-ൽ ഓപ്പൺ എഐ ഒരു ലാഭേച്ഛയില്ലാത്ത സ്ഥാപനമായിരുന്ന കാലത്ത്, സാം ആൾട്ട്മാന്റെ ദീർഘവീക്ഷണത്തിൽ വിശ്വസിച്ച് മൂന്ന് മില്യൺ ഡോളർ (ഏകദേശം 25 കോടി രൂപ) ഇൻഫോസിസ് സംഭാവനയായി നൽകിയിരുന്നു. “ഞാൻ ഇൻഫോസിസിൽ ചുമതലയേറ്റ സമയമായിരുന്നു അത്. മനുഷ്യനേക്കാൾ മികച്ച രീതിയിൽ കാഴ്ചാപരമായ കാര്യങ്ങൾ ചെയ്യാൻ ന്യൂറൽ നെറ്റ്വർക്കിന് സാധിക്കുമെന്ന് അന്ന് തന്നെ എനിക്ക് വ്യക്തമായിരുന്നു. അതുകൊണ്ടാണ് ഓപ്പൺ എഐയുമായി സഹകരിക്കാൻ അന്ന് തീരുമാനിച്ചത്,” വിശാൽ സിക്ക പറഞ്ഞു. എന്നാൽ ഇൻഫോസിസ് പോലുള്ള വലിയ കമ്പനികൾക്ക് എന്തുകൊണ്ട് പിന്നീട് ഓപ്പൺ എഐയോ ആന്ത്രോപ്പിക്കോ (Anthropic) കൈവരിച്ച നേട്ടം ഉണ്ടാക്കാൻ സാധിച്ചില്ല എന്ന ചോദ്യത്തിന്, പഴയ കാര്യങ്ങൾ വിശകലനം ചെയ്യാൻ ആഗ്രഹിക്കുന്നില്ലെന്നും തന്റെ ദീർഘവീക്ഷണം പിന്നീട് ഇൻഫോസിസിൽ തുടരാനായില്ലെന്നുമാണ് അദ്ദേഹം സൂചിപ്പിച്ചത്.
2014-ൽ സിഇഒ ആയി ചുമതലയേറ്റ സിക്കയ്ക്ക് ഇൻഫോസിസിലെ പഴയ രീതികളുമായി പൊരുത്തപ്പെടാൻ സാധിച്ചിരുന്നില്ല. 2017-ൽ അദ്ദേഹം രാജിവെച്ചൊഴിഞ്ഞപ്പോൾ, അടിസ്ഥാനരഹിതമായ വ്യക്തിപരമായ ആക്രമണങ്ങൾ കാരണമാണ് താൻ മാറുന്നതെന്ന് ജീവനക്കാർക്ക് അയച്ച കത്തിൽ വ്യക്തമാക്കിയിരുന്നു. ഇൻഫോസിസിന്റെ പരമ്പരാഗതമായ പ്രവർത്തന രീതികളിൽ മാറ്റം വരുത്താൻ സിക്ക ശ്രമിച്ചത് വലിയ തർക്കങ്ങൾക്ക് വഴിവെച്ചിരുന്നു. കുറഞ്ഞ കൂലിക്ക് ആളുകളെ നൽകുന്ന ‘സർവീസ്’ മോഡലിൽ നിന്ന് മാറി സ്വന്തമായി എഐ പ്ലാറ്റ്ഫോമുകൾ വികസിപ്പിക്കാനായിരുന്നു അദ്ദേഹം ശ്രമിച്ചത്.
ഇന്ന് ക്ലോഡ് (Claude), കോഡെക്സ് (Codex) തുടങ്ങിയ എഐ ടൂളുകൾ സോഫ്റ്റ്വെയർ നിർമ്മാണം ലളിതമാക്കുമ്പോൾ, ഇന്ത്യൻ ഐടി കമ്പനികളുടെ ഭാവി അപകടത്തിലാണെന്ന് വിദഗ്ധർ മുന്നറിയിപ്പ് നൽകുന്നുണ്ട്. കഴിഞ്ഞ കുറച്ചു വർഷങ്ങളായി ഐടി ഭീമന്മാരുടെ വരുമാന വളർച്ച മുരടിച്ചതും ഓഹരി വിപണിയിലെ തളർച്ചയും ഇതിന് തെളിവായി ചൂണ്ടിക്കാണിക്കപ്പെടുന്നു. 11 വർഷം മുൻപ് കണ്ട സ്വപ്നം പാതിവഴിയിൽ ഉപേക്ഷിച്ച ഇൻഫോസിസിന്, ഇന്ന് ലോകം മാറ്റിമറിക്കുന്ന എഐ വിപ്ലവത്തിൽ ഒരു കാഴ്ചക്കാരനായി നിൽക്കേണ്ടി വരുന്നു എന്നത് ഐടി മേഖലയിലെ വലിയൊരു തിരിച്ചറിവാണ്.
Discussion about this post