ആ ഒരു ട്രിക്ക് സൂര്യ മിസ്സ് ചെയ്തു; നായകന് പറ്റിയ പാളിച്ച ചൂണ്ടിക്കാട്ടി മുൻ താരം; പറയുന്നത് ഇങ്ങനെ

2026 ടി20 ലോകകപ്പിലെ ഗ്രൂപ്പ് ഘട്ട മത്സരങ്ങൾ പൂർത്തിയാകുമ്പോൾ, ഇന്ത്യൻ നായകൻ സൂര്യകുമാർ യാദവിന്റെ ക്യാപ്റ്റൻസിയെയും ബാറ്റിംഗ് തന്ത്രങ്ങളെയും കുറിച്ച് മുൻ താരങ്ങളായ സഹീർ ഖാനും മുരളി കാർത്തിക്കും നടത്തിയ നിരീക്ഷണങ്ങൾ ശ്രദ്ധേയമാകുന്നു. നെതർലൻഡ്‌സിനെതിരായ മത്സരത്തിൽ സൂര്യകുമാർ മൂന്നാം നമ്പറിൽ ബാറ്റിംഗിന് ഇറങ്ങണമായിരുന്നു എന്നാണ് സഹീർ ഖാൻ അഭിപ്രായപ്പെട്ടത്.

അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന മത്സരത്തിൽ ഇന്ത്യ വിജയം നേടിയെങ്കിലും ചില തന്ത്രപരമായ മാറ്റങ്ങൾ വരുത്താമായിരുന്നു എന്ന് സഹീർ ഖാൻ ചൂണ്ടിക്കാട്ടി. “നെതർലൻഡ്‌സ് അവരുടെ ഓഫ് സ്പിന്നർ ആര്യൻ ദത്തിനെ പവർപ്ലേയിൽ പന്തേൽപ്പിക്കുമ്പോൾ അത് കണ്ടിട്ട് ഇടങ്കയ്യൻ ബാറ്റർമാർക്ക് പകരം സൂര്യകുമാർ നേരത്തെ ഇറങ്ങണമായിരുന്നു. ഇടങ്കയ്യൻ-വലംകയ്യൻ കോമ്പിനേഷനെക്കുറിച്ച് സംസാരിക്കുന്ന ഇന്ത്യക്ക് സൂര്യയെ മൂന്നാം നമ്പറിൽ ഇറക്കി ഈ അവസരം പ്രയോജനപ്പെടുത്താമായിരുന്നു.”

“എനിക്ക് മൂന്നാം നമ്പറിലും തിളങ്ങാൻ കഴിയും” എന്നൊരു സന്ദേശം നൽകാൻ നായകന് ലഭിച്ച മികച്ച അവസരമായിരുന്നു ഇതെന്ന് സഹീർ ഖാൻ ക്രിക്ബസിനോട് പറഞ്ഞു. അതേസമയം, സൂര്യകുമാറിന്റെ ക്യാപ്റ്റൻസിയെ വാനോളം പുകഴ്ത്തിയാണ് മുൻ സ്പിന്നർ മുരളി കാർത്തിക് സംസാരിച്ചത്.

“രോഹിത് ശർമ്മയെപ്പോലെ വളരെ ശാന്തനായാണ് സൂര്യകുമാർ ടീമിനെ നയിക്കുന്നത്. കളിക്കാർക്ക് ആത്മവിശ്വാസം നൽകുന്നതിലും അവരോട് ആശയവിനിമയം നടത്തുന്നതിലും സൂര്യ മികച്ചുനിൽക്കുന്നു. ഗ്രൗണ്ടിൽ ഒരിക്കലും പ്രകോപിതനാകാത്ത താരമാണ് അവൻ.  തോൽവിയിലും വിജയത്തിലും പുഞ്ചിരിയോടെ അയാൾ പെരുമാറുന്നത് ടീമിന് ഗുണം ചെയ്യും.”

ഈ ടൂർണമെന്റിൽ ഇതുവരെ 4 മത്സരങ്ങളിൽ നിന്ന് 162 റൺസ് നേടി മികച്ച ഫോമിലാണ് സൂര്യകുമാർ യാദവ്. സൂപ്പർ-8ൽ കരുത്തരായ ദക്ഷിണാഫ്രിക്കയെ നേരിടുമ്പോൾ ഓപ്പണർ അഭിഷേക് ശർമ്മയുടെ മോശം ഫോം ഇന്ത്യക്ക് ആശങ്കയാകുന്നുണ്ട്.