ടി20 ലോകകപ്പിൽ നെതർലൻഡ്സിനെതിരെ വെടിക്കെട്ട് പ്രകടനം പുറത്തെടുത്ത ശിവം ദുബെ തന്റെ വിജയരഹസ്യം വെളിപ്പെടുത്തിയിരിക്കുകയാണ്. തന്റെ ബാറ്റിംഗ് ശൈലിയിൽ വലിയ മാറ്റം വരുത്തിയത് മുൻ ഇന്ത്യൻ നായകൻ എം.എസ്. ധോണിയുടെ ഉപദേശമാണെന്ന് ദുബെ പറഞ്ഞു.
നെതർലൻഡ്സിനെതിരായ മത്സരത്തിൽ 31 പന്തിൽ 66 റൺസ് അടിച്ചുകൂട്ടിയ ശിവം ദുബെയാണ് ഇന്ത്യയെ കൂറ്റൻ സ്കോറിലെത്തിച്ചത്. തന്റെ ബാറ്റിംഗിനെക്കുറിച്ച് സ്റ്റാർ സ്പോർട്സിനോട് സംസാരിക്കവേയാണ് താരം ധോണിയെക്കുറിച്ച് പരാമർശിച്ചത്. ക്രീസിലെത്തിയാൽ ഉടൻ സിക്സർ അടിക്കാൻ ശ്രമിക്കുന്ന പഴയ രീതി ദുബെ ഇപ്പോൾ മാറ്റിയിരിക്കുകയാണ്. അതിന് പിന്നിൽ ധോണിയുടെ വാക്കുകളാണെന്ന് ദുബെ വെളിപ്പെടുത്തി.
“എല്ലാ പന്തിലും സിക്സർ അടിക്കണമെന്നത് നിർബന്ധമില്ല. നിങ്ങൾക്ക് ഒരു ഫോർ അടിക്കാനോ സിംഗിൾ എടുക്കാനോ സാധിക്കും.” ധോണി പറഞ്ഞതായി ശിവം ദുബൈ ഓർത്തു.
ക്രീസിലെത്തുന്ന തുടക്ക സമയത്ത് ഈ ഉപദേശം എപ്പോഴും മനസ്സിലുണ്ടാകാറുണ്ടെന്ന് ദുബെ പറഞ്ഞു. ഓരോ പന്തിനെയും അതിന്റെ ഗുണനിലവാരം അനുസരിച്ച് നേരിടാൻ ഇത് തന്നെ സഹായിക്കുന്നുണ്ടെന്നും താരം കൂട്ടിച്ചേർത്തു. ആദ്യ ഓവറുകളിൽ ഇന്ത്യ പതറിയെങ്കിലും അഞ്ചാം നമ്പറിൽ ഇറങ്ങിയ ദുബെ കളി മാറ്റുകയായിരുന്നു.
ധോണി പറഞ്ഞതുപോലെ തുടക്കത്തിൽ പന്ത് നോക്കി കളിച്ച ദുബെ, പിന്നീട് തന്റെ സ്വഭാവിക ശൈലിയിലേക്ക് മാറുകയായിരുന്നു.
