ദേശീയപാതയിലൂടെയുള്ള യാത്രയ്ക്കിടെ വൃത്തിയില്ലാത്ത ശൗചാലയങ്ങൾ കണ്ട് മടുത്തവർക്ക് ഇനി കൈനിറയെ പണം സമ്പാദിക്കാം. നാഷണൽ ഹൈവേ അതോറിറ്റി ഓഫ് ഇന്ത്യ (NHAI) ആവിഷ്കരിച്ച ‘ക്ലീൻ ടോയ്ലറ്റ് പിക്ചർ ചലഞ്ചിന്’ യാത്രക്കാർക്കിടയിൽ വൻ സ്വീകാര്യതയാണ് ലഭിക്കുന്നത്. ദേശീയപാതകളിലെ ടോൾ പ്ലാസകളോട് ചേർന്ന് പ്രവർത്തിക്കുന്ന ശൗചാലയങ്ങൾ വൃത്തിഹീനമാണെങ്കിൽ അതിന്റെ ഫോട്ടോ എടുത്ത് അയക്കുന്നവർക്കാണ് 1000 രൂപ സമ്മാനം ലഭിക്കുക. കേന്ദ്ര സർക്കാരിന്റെ സ്പെഷ്യൽ ക്യാമ്പയിൻ 5.0-യുടെ ഭാഗമായാണ് ഈ വ്യത്യസ്തമായ പദ്ധതി നടപ്പിലാക്കുന്നത്.
എൻ.എച്ച്.എ.ഐയുടെ ‘രാജ്മാർഗ് യാത്ര’ (Rajmarg Yatra) എന്ന മൊബൈൽ ആപ്പ് വഴിയാണ് ചിത്രങ്ങൾ അയക്കേണ്ടത്. ടോൾ പ്ലാസകളിലെ ശൗചാലയങ്ങളുടെ ദുരവസ്ഥ വ്യക്തമാക്കുന്ന ചിത്രങ്ങൾ ജിയോടാഗ് (Geotag) സഹിതം വേണം ആപ്പിൽ അപ്ലോഡ് ചെയ്യാൻ. അയക്കുന്ന ഫോട്ടോയുടെ ആധികാരികത എഐ (AI) സാങ്കേതികവിദ്യ ഉപയോഗിച്ച് ഉദ്യോഗസ്ഥർ പരിശോധിക്കും. പരാതി സത്യമാണെന്ന് ബോധ്യപ്പെട്ടാൽ ഉടൻ തന്നെ സമ്മാനത്തുകയായ 1000 രൂപ യാത്രക്കാരന്റെ ഫാസ്ടാഗ് (FASTag) അക്കൗണ്ടിലേക്ക് എത്തും. ഇതിനോടകം 350-ഓളം യാത്രക്കാർ ചിത്രങ്ങൾ അയച്ചതിൽ 265 പേർക്ക് സമ്മാനത്തുക ലഭിച്ചതായാണ് റിപ്പോർട്ടുകൾ.
ദേശീയപാതകളിലെ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനും ശുചിത്വം ഉറപ്പാക്കുന്നതിനും പൊതുജനങ്ങളെ നേരിട്ട് പങ്കാളികളാക്കുക എന്നതാണ് ഈ പദ്ധതിയുടെ ലക്ഷ്യം. വൃത്തിഹീനമായ ശൗചാലയങ്ങളെക്കുറിച്ച് പരാതികൾ ഉയരുന്നത് പതിവായതോടെയാണ് ഇത്തരമൊരു ‘മണി ചലഞ്ച്’ അതോറിറ്റി അവതരിപ്പിച്ചത്. ജൂൺ 30 വരെ ഈ ചലഞ്ച് തുടരുമെന്ന് അധികൃതർ അറിയിച്ചു. ടോൾ നൽകി യാത്ര ചെയ്യുന്നവർക്ക് മികച്ച സേവനം ഉറപ്പാക്കാൻ ഈ നീക്കം സഹായിക്കുമെന്നാണ് വിലയിരുത്തൽ. നിങ്ങളും യാത്രയ്ക്കിടയിൽ ഇത്തരം മോശം ശൗചാലയങ്ങൾ ശ്രദ്ധയിൽപ്പെട്ടാൽ ഒട്ടും മടിക്കണ്ട, ഫോട്ടോ എടുത്ത് സമ്മാനം നേടാം.
