ലോകമെമ്പാടുമുള്ള കോടിക്കണക്കിന് ആളുകൾ ദിവസവും സൗജന്യമായി ഉപയോഗിക്കുന്ന ചാറ്റ് ജിപിടി (ChatGPT) എന്ന എഐ പ്ലാറ്റ്ഫോമിന് പിന്നിൽ ഓരോ വർഷവും ചെലവാകുന്നത് ശതകോടികളാണെന്ന റിപ്പോർട്ടുകൾ പുറത്ത്. 800 മുതൽ 900 മില്യൺ വരെ ആളുകൾ ആഴ്ചതോറും ഉപയോഗിക്കുന്ന ഈ പ്ലാറ്റ്ഫോമിന്റെ പ്രവർത്തനങ്ങൾക്കായി ഓപ്പൺ എഐ (OpenAI) പ്രതിവർഷം ഏകദേശം 17 ബില്യൺ ഡോളർ (ഏകദേശം 1.4 ലക്ഷം കോടിയിലധികം രൂപ) ആണ് ചെലവിടുന്നത്. ഉപയോക്താക്കൾ നൽകുന്ന ലളിതമായ ഓരോ നിർദ്ദേശങ്ങളും (Prompts) ആയിരക്കണക്കിന് ഹൈ-പെർഫോമൻസ് ചിപ്പുകളിലൂടെയും വൻതോതിലുള്ള വൈദ്യുതി ഉപയോഗത്തിലൂടെയുമാണ് പ്രോസസ്സ് ചെയ്യപ്പെടുന്നത്.
മുൻപ് പുറത്തുവന്ന കണക്കുകൾ പ്രകാരം ചാറ്റ് ജിപിടിയുടെ പ്രതിദിന ചെലവ് ഏഴ് ലക്ഷം ഡോളറായിരുന്നു. എന്നാൽ പുതിയ മോഡലുകൾ എത്തിയതോടെയും ഉപയോക്താക്കളുടെ എണ്ണത്തിൽ വൻ വർദ്ധനവുണ്ടായതോടെയും ഈ കണക്കുകൾ ഇന്ന് പഴയതായി മാറിയിരിക്കുകയാണ്. നിലവിൽ വിപുലമായ വോയ്സ്, ഇമേജ് സൗകര്യങ്ങൾ കൂടി എത്തിയതോടെ ഇൻഫ്രാസ്ട്രക്ചർ ചെലവ് കുത്തനെ ഉയർന്നു. 2025-ഓടെ ഓപ്പൺ എഐയുടെ വിപണി മൂല്യം 500 ബില്യൺ ഡോളറിന് അടുത്തെത്തിയെങ്കിലും, 2030-ന് മുൻപ് കമ്പനി ലാഭത്തിലേക്ക് നീങ്ങാൻ സാധ്യതയില്ലെന്നാണ് റിപ്പോർട്ടുകൾ സൂചിപ്പിക്കുന്നത്.
യഥാർത്ഥത്തിൽ ‘സൗജന്യ’ ഉപയോക്താക്കളുടെ ഭാരം ചുമക്കുന്നത് കമ്പനിയുടെ സബ്സ്ക്രിപ്ഷൻ പ്ലാനുകൾ (Plus, Pro, Enterprise) ഉപയോഗിക്കുന്നവരും മൈക്രോസോഫ്റ്റ് പോലുള്ള വൻകിട നിക്ഷേപകരുമാണ്. 2025-ൽ കമ്പനിയുടെ വാർഷിക വരുമാനം 20 ബില്യൺ ഡോളറിലേക്ക് എത്തിയെങ്കിലും പശ്ചാത്തല സൗകര്യങ്ങൾക്കായുള്ള ചിലവ് അതിലും മുകളിലാണ്. ഡെവലപ്പർമാർ മോഡലുകൾ ഉപയോഗിക്കുന്നതിനായി നൽകുന്ന തുകയും, വരാനിരിക്കുന്ന ഐപിഒ (IPO) വഴിയുള്ള നിക്ഷേപങ്ങളും മാത്രമാണ് നിലവിൽ കമ്പനിയെ താങ്ങിനിർത്തുന്നത്. നിലവിൽ ചില രാജ്യങ്ങളിൽ സൗജന്യ ഉപയോക്താക്കൾക്കായി പരസ്യങ്ങൾ പരീക്ഷിക്കാനും ഓപ്പൺ എഐ ആലോചിക്കുന്നുണ്ട്. നമ്മൾ കാണുന്ന ഈ സൗജന്യ സേവനം സത്യത്തിൽ ലാഭകരമായ ഒരു ഭാവിയെ ലക്ഷ്യം വെച്ചുള്ള കോടിക്കണക്കിന് ഡോളറുകളുടെ നിക്ഷേപം മാത്രമാണ്.
Discussion about this post