ഹാർദിക് പാണ്ഡ്യയും നടാഷ സ്റ്റാൻകോവിച്ചും തങ്ങളുടെ ദാമ്പത്യം അവസാനിപ്പിച്ചെങ്കിലും, മകൻ അഗസ്ത്യയുടെ സന്തോഷത്തിനായി അവർ പുലർത്തുന്ന സ്നേഹബന്ധം ആരാധകർക്ക് വലിയൊരു മാതൃകയാവുകയാണ്. നാല് കോടി രൂപയോളം വിലമതിക്കുന്ന ഒരു അത്യാധുനിക എസ്യുവി തന്റെ മുൻ ഭാര്യയ്ക്കും മകനുമായി ഹാർദിക് പാണ്ഡ്യ നൽകി എന്ന വാർത്തയാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്.
മുംബൈയിലെ നിരത്തുകളിൽ ഇപ്പോൾ ചർച്ചാവിഷയം നടാഷ സ്റ്റാൻകോവിച്ചിന്റെ പുത്തൻ വാഹനമാണ്. കറുപ്പ് നിറത്തിലുള്ള കരുത്തുറ്റ ലാൻഡ് റോവർ ഡിഫൻഡറിനൊപ്പം നടാഷയും മകൻ അഗസ്ത്യയും നിൽക്കുന്ന ചിത്രങ്ങൾ സോഷ്യൽ മീഡിയയിൽ വൈറലായിക്കഴിഞ്ഞു.
ഹാർദിക് പാണ്ഡ്യ തന്നെയാണ് ഈ വാഹനം അവർക്കായി വാങ്ങിയതെന്ന് സൂചിപ്പിക്കുന്നതാണ് വാഹന നിർമ്മാതാക്കളായ നവനീത് മോട്ടോഴ്സിന്റെ സോഷ്യൽ മീഡിയ പോസ്റ്റ്. “മിസ്റ്റർ ഹാർദിക് പാണ്ഡ്യ ഒരിക്കൽ കൂടി തന്റെ ഡിഫൻഡർ വാങ്ങാൻ നവനീത് മോട്ടോഴ്സിനെ തിരഞ്ഞെടുത്തു. വിശ്വാസത്തിൽ കെട്ടിപ്പടുത്ത ബന്ധം. അഗസ്ത്യ പാണ്ഡ്യയ്ക്കും നടാഷ സ്റ്റാൻകോവിച്ചിനുമായി ലാൻഡ് റോവർ ഡിഫൻഡർ കൈമാറുന്നു,” എന്നായിരുന്നു അവരുടെ കുറിപ്പ്. ഇതിന്റെ ഏകദേശ വില 3 മുതൽ 4 കോടി രൂപ വരെയാണ്.
2024 ജൂലൈയിലാണ് ഹാർദിക്കും നടാഷയും ഔദ്യോഗികമായി പിരിഞ്ഞത്. എങ്കിലും മകന്റെ കാര്യത്തിൽ ഇരുവരും അതീവ ജാഗ്രത പുലർത്തുന്നു. ഹാർദിക് നിലവിൽ മോഡൽ മാഹിക ശർമ്മയുമായി പ്രണയത്തിലാണെങ്കിലും, തന്റെ ജീവിതത്തിലെ മുൻഗണന എപ്പോഴും മകൻ അഗസ്ത്യക്കാണെന്ന് ഈ വലിയ സമ്മാനത്തിലൂടെ അദ്ദേഹം ഒരിക്കൽ കൂടി തെളിയിച്ചിരിക്കുകയാണ്. നടാഷയും ഇപ്പോൾ തന്റെ കരിയറിൽ കൂടുതൽ ശ്രദ്ധ കേന്ദ്രീകരിച്ചു വരികയാണ്.
ജീവിതത്തിലെ വെല്ലുവിളികൾ തന്നെ കൂടുതൽ കരുത്തയാക്കിയെന്നും പുതിയൊരു സ്നേഹബന്ധത്തിന് താൻ തയ്യാറാണെന്നും നടാഷ അടുത്തിടെ അഭിമുഖങ്ങളിൽ വ്യക്തമാക്കിയിരുന്നു. ഹാർദിക് തന്റെ കാമുകി മാഹിക ശർമ്മയുടെ 25-ാം ജന്മദിനം ആഘോഷിക്കുന്ന വീഡിയോ പങ്കുവെച്ചതും വലിയ വാർത്തയായിരുന്നു.
