ഈഡൻ ഗാർഡൻസിൽ വിൻഡീസിനെതിരെ 50 പന്തിൽ 97 റൺസുമായി ഇന്ത്യയെ സെമിയിലെത്തിച്ച സഞ്ജു സാംസൺ, തന്റെ കരിയറിലെ ഏറ്റവും മികച്ച ഇന്നിംഗ്സുകളിൽ ഒന്നാണ് പുറത്തെടുത്തത്. എന്നാൽ മത്സരത്തിനിടയിലെ ഒരു ഡ്രിങ്ക്സ് ബ്രേക്കിൽ നടന്ന രസകരമായ സംഭവമാണ് ഇപ്പോൾ ക്രിക്കറ്റ് ലോകത്തെ ചിരിപ്പിക്കുന്നത്.
മത്സരത്തിനിടയിലെ ഡ്രിങ്ക്സ് ബ്രേക്കിൽ പന്ത്രണ്ടാമനായി എത്തിയതായിരുന്നു റിങ്കു സിംഗും കുൽദീപ് യാദവും. ആ സമയത്ത് മുഖം തുടയ്ക്കാനായി സഞ്ജു തന്റെ ബാറ്റ് റിങ്കുവിന്റെ കയ്യിൽ നൽകി. എന്നാൽ ടൗവൽ തിരികെ നൽകിയ ശേഷം ബാറ്റ് വാങ്ങാൻ സഞ്ജു മറന്നുപോയി. ബാറ്റ് റിങ്കുവിന്റെ കയ്യിലിരിക്കെ സഞ്ജു ക്രീസിലേക്ക് നടക്കുകയും ചെയ്തു. ഉടൻ തന്നെ കാര്യം മനസ്സിലാക്കി സഞ്ജു ചിരിച്ചുകൊണ്ട് ബാറ്റ് തിരികെ വാങ്ങുന്ന വീഡിയോ ഇപ്പോൾ വൈറലാണ്.
മത്സരത്തിലെ സഞ്ജുവിന്റെ പോരാട്ടവീര്യത്തെ ക്യാപ്റ്റൻ സൂര്യകുമാർ യാദവ് വാനോളം പുകഴ്ത്തിയിരുന്നു. “നല്ല ആളുകൾക്ക് ശരിയായ സമയത്ത് നല്ലത് സംഭവിക്കുമെന്ന് ഞാൻ എപ്പോഴും പറയാറുണ്ട്. സഞ്ജുവിന് ഇതിലും മികച്ചൊരു വേദി ലഭിക്കാനില്ല. ടീമിലേക്ക് വന്നപ്പോൾ തന്നെ അദ്ദേഹം പറഞ്ഞത് ‘ടീമിന് എന്താണോ ആവശ്യം അത് നമുക്ക് ചെയ്യാം’ എന്നാണ്. വ്യക്തിപരമായ നേട്ടങ്ങളേക്കാൾ ടീമിന് മുൻഗണന നൽകുന്ന സ്വഭാവമാണ് അദ്ദേഹത്തിന്റേത്,” ബിസിസിഐ പങ്കുവെച്ച വീഡിയോയിൽ സൂര്യകുമാർ പറഞ്ഞു.
ഒരുപാട് കഷ്ടപ്പാടുകൾക്കും കാത്തിരിപ്പിനും ശേഷമുള്ള സഞ്ജുവിന്റെ ഈ നേട്ടം അർഹിച്ചതാണെന്നും ഇന്ത്യൻ ക്യാപ്റ്റൻ കൂട്ടിച്ചേർത്തു. ഇംഗ്ലണ്ടിനെതിരായ സെമി ഫൈനലിലും സഞ്ജുവിൽ നിന്ന് ഇതേ പ്രകടനം പ്രതീക്ഷിക്കുന്നതായി സ്കൈ വ്യക്തമാക്കി.
Rinku Singh Mistakenly Walks Away With Sanju Samson’s Bat 😂
Reaction Of Kuldeep and Samson Was Priceless 😂 pic.twitter.com/2tDrSokmZd
— CricketSanctum (@SanctumCricket) March 2, 2026
