ഇറാൻ ഭരണകൂടത്തിന്റെ ഹൃദയഭാഗമായ പാസ്ചർ സ്ട്രീറ്റിലെ അതീവ സുരക്ഷാ മേഖലയിൽ പോലും ഇസ്രായേലിന്റെ കണ്ണുകൾ ഉണ്ടായിരുന്നുവെന്ന് റിപ്പോർട്ട്. വർഷങ്ങളായി തെഹ്റാനിലെ ട്രാഫിക് ക്യാമറകൾ ഹാക്ക് ചെയ്ത് ഇസ്രായേൽ നടത്തിയ നിരീക്ഷണമാണ് 86-കാരനായ ഖമേനിയുടെ അന്ത്യത്തിന് വഴിയൊരുക്കിയത്.
ടെഹ്റാനിലെ ട്രാഫിക് ക്യാമറകളിൽ ഭൂരിഭാഗവും വർഷങ്ങളായി ഇസ്രായേലിന്റെ നിയന്ത്രണത്തിലായിരുന്നു. ഖമേനിയുടെ ഓഫീസിനും താമസസ്ഥലത്തിനും സമീപമുള്ള ഒരു പ്രത്യേക ക്യാമറയിൽ നിന്നുള്ള ദൃശ്യങ്ങൾ ഇസ്രായേലിന് നിർണ്ണായക വിവരങ്ങൾ നൽകി. സുരക്ഷാ ഉദ്യോഗസ്ഥരുടെ വീടുകൾ, ഡ്യൂട്ടി സമയം, അവർ സഞ്ചരിക്കുന്ന റൂട്ടുകൾ എന്നിവ കൃത്യമായി വിശകലനം ചെയ്ത് “പാറ്റേൺ ഓഫ് ലൈഫ്” എന്ന രഹസ്യരേഖ മൊസാദ് തയ്യാറാക്കി.
ആക്രമണത്തിന് തൊട്ടുമുമ്പ് ഖമേനിയുടെ സുരക്ഷാ സംഘത്തിന് മുന്നറിയിപ്പ് സന്ദേശങ്ങൾ ലഭിക്കാതിരിക്കാൻ പാസ്ചർ സ്ട്രീറ്റിലെ പത്തോളം മൊബൈൽ ടവറുകൾ ഇസ്രായേൽ തകരാറിലാക്കി. ഫോണുകൾ വിളിക്കുമ്പോൾ ‘ബിസി’ എന്ന് കാണിക്കുന്ന തരത്തിലാണ് ഈ സാങ്കേതിക വിദ്യ ഉപയോഗിച്ചത്. ഇതിലൂടെ പുറത്തുനിന്നുള്ള യാതൊരു മുന്നറിയിപ്പും അകത്തെത്തുന്നത് തടഞ്ഞു.
ഇസ്രായേലിന്റെ പക്കൽ സാങ്കേതിക വിവരങ്ങൾ ഉണ്ടായിരുന്നെങ്കിൽ, ഖമേനി ശനിയാഴ്ച രാവിലെ മീറ്റിംഗിന് എത്തുമെന്നുള്ള കൃത്യമായ വിവരം നൽകിയത് അമേരിക്കൻ ഏജൻസിയായ സിഐഎ (CIA) ആണ്. ശനിയാഴ്ച രാവിലെ ഖമേനിയും മറ്റ് മുതിർന്ന നേതാക്കളും പ്രഭാതഭക്ഷണത്തിനായി ഒത്തുകൂടുമെന്ന വിവരം ഈ ഉറവിടത്തിൽ നിന്നാണ് ലഭിച്ചത്. ആയിരം കിലോമീറ്റർ അകലെയിരുന്ന് ഒരു ഊണുമേശയുടെ അത്രയും ചെറിയ ലക്ഷ്യം പോലും തകർക്കാൻ ശേഷിയുള്ള ‘സ്പാരോ’ മിസൈലുകളാണ് ഇസ്രായേൽ ഉപയോഗിച്ചത്. അമേരിക്ക ഇറാന്റെ റഡാറുകളെയും ആശയവിനിമയ സംവിധാനങ്ങളെയും സൈബർ ആക്രമണത്തിലൂടെ അന്ധമാക്കിയതോടെ ഇസ്രായേൽ യുദ്ധവിമാനങ്ങൾക്ക് തടസ്സമില്ലാതെ ലക്ഷ്യം കാണാനായി.
“അതിനൂതനമായ ട്രാക്കിംഗ് സംവിധാനങ്ങളിൽ നിന്ന് രക്ഷപ്പെടാൻ ഖമേനിക്ക് കഴിഞ്ഞില്ല. അദ്ദേഹത്തിനും കൂടെയുണ്ടായിരുന്ന നേതാക്കൾക്കും ഒന്നും ചെയ്യാൻ സാധിക്കുമായിരുന്നില്ല,” എന്ന് ഡൊണാൾഡ് ട്രംപ് സോഷ്യൽ മീഡിയയിൽ കുറിച്ചു. ഏകദേശം 200 യുദ്ധവിമാനങ്ങൾ പങ്കെടുത്ത ഇസ്രായേൽ ചരിത്രത്തിലെ ഏറ്റവും വലിയ സൈനിക നീക്കമായിരുന്നു ഇത്.
