കോച്ച് സാബ്, ആ ചിരി നിങ്ങൾക്ക് നന്നായി ചേരുന്നുണ്ട്; ഗംഭീറിനെ ചിരിപ്പിച്ച് ധോണിയുടെ കമന്റ്; തകർപ്പൻ മറുപടി നൽകി പരിശീലകൻ; പറഞ്ഞത് ഇങ്ങനെ

2026 ടി20 ലോകകപ്പ് ഫൈനലിൽ ന്യൂസിലൻഡിനെ തകർത്ത് ഇന്ത്യ മൂന്നാം വട്ടം കിരീടം ചൂടിയപ്പോൾ, മൈതാനത്തിന് പുറത്ത് ആരാധകരുടെ മനം കവർന്നത് എം.എസ്. ധോണിയും ഗൗതം ഗംഭീറും തമ്മിലുള്ള അപൂർവ്വമായ സ്നേഹപ്രകടനമാണ്. 96 റൺസിന്റെ പടുകൂറ്റൻ ജയത്തോടെ ഇന്ത്യ കിരീടം നിലനിർത്തിയതിന് പിന്നാലെ ധോണി ഇൻസ്റ്റാഗ്രാമിൽ പങ്കുവെച്ച കുറിപ്പും അതിന് ഗംഭീർ നൽകിയ മറുപടിയും ഇപ്പോൾ സോഷ്യൽ മീഡിയയിൽ വൈറലാവുകയാണ്.

മത്സരശേഷം ഇന്ത്യൻ ടീമിനെ അഭിനന്ദിച്ചുകൊണ്ട് ധോണി ഇൻസ്റ്റാഗ്രാമിൽ ഒരു ചിത്രം പങ്കുവെച്ചു. അതിൽ ഗൗതം ഗംഭീറിനായി അദ്ദേഹം ഒരു പ്രത്യേക സന്ദേശവും കുറിച്ചു: “കോച്ച് സാബ്, ആ ചിരി നിങ്ങൾക്ക് നന്നായി ചേരുന്നുണ്ട്. ഗൗരവത്തോടൊപ്പമുള്ള ആ ചിരി ഒരു ‘കില്ലർ കോമ്പോ’ തന്നെയാണ്.”

എപ്പോഴും ഗൗരവക്കാരനായി കാണപ്പെടാറുള്ള ഗംഭീറിനോട് കൂടുതൽ ചിരിക്കണമെന്ന ധോണിയുടെ ഈ സ്നേഹോപദേശം ആരാധകർ ആവേശത്തോടെയാണ് ഏറ്റെടുത്തത്. എന്തായാലും ഇന്ന് ഉച്ചയോടെ ധോണിയുടെ പോസ്റ്റിന് താഴെ ഗംഭീർ മറുപടിയുമായി എത്തി. “ചിരിക്കാൻ ഇതിലും വലിയൊരു കാരണം വേറെയെന്തുണ്ട്? നിങ്ങളെ കാണാൻ കഴിഞ്ഞതിൽ വലിയ സന്തോഷം,” ഗംഭീർ കുറിച്ചു.

2011 ലോകകപ്പ് ഫൈനലിലെ വിജയശില്പികളായ ഈ സഖ്യം വർഷങ്ങൾക്ക് ശേഷം ഒരു ലോകകപ്പ് വേദിയിൽ വീണ്ടും ഒന്നിച്ചത് ക്രിക്കറ്റ് പ്രേമികൾക്ക് ഗൃഹാതുരമായ ഓർമ്മയായി മാറി.ഫൈനൽ മത്സരം തുടങ്ങുന്നതിന് മുൻപ് കായികലോകത്തെ സാക്ഷിയാക്കി എം.എസ്. ധോണിയും രോഹിത് ശർമ്മയും ചേർന്നാണ് ലോകകപ്പ് ട്രോഫി മൈതാനത്തേക്ക് കൊണ്ടുവന്നത്. കപിൽ ദേവ്, ഐസിസി ചെയർമാൻ ജയ് ഷാ എന്നിവരും ഇവർക്കൊപ്പമുണ്ടായിരുന്നു. ഇന്ത്യയുടെ മൂന്ന് ലോകകപ്പ് നായകന്മാരും ഒരേ വേദിയിൽ എത്തിയത് അഹമ്മദാബാദിലെ നീലക്കടലിനെ ആവേശത്തിലാഴ്ത്തി. ഇന്ത്യയുടെ അവസാന വിക്കറ്റ് വീണപ്പോൾ ഗാലറിയിലിരുന്ന് ആവേശം പങ്കുവെക്കുന്ന ധോണിയുടെയും രോഹിത്തിന്റെയും ദൃശ്യങ്ങളും പുറത്തുവന്നു.