കുംഭമേളയിലെ വൈറൽ പെൺകുട്ടി മൊണാലിസ ഭോസ്ലെയുടെ വിവാഹം സിപിഎം നേതാക്കൾ ചേർന്ന് നടത്തിക്കൊടുത്തതിന് പിന്നാലെ രൂക്ഷ പരിഹാസവുമായി ബിജെപി നേതാവ് പിസി ജോർജ്. സിപിഎമ്മിന്റെ വളർച്ച പോളിറ്റ് ബ്യൂറോയിൽ നിന്ന് മാര്യേജ് ബ്യൂറോയിലേക്കാണെന്നും, കല്യാണം നടത്തിക്കൊടുക്കുന്ന തിരക്കിലാണെങ്കിൽ പാലക്കാട് എംഎൽഎ രാഹുൽ മാങ്കൂട്ടത്തിലിനെ കൂടി പിടിച്ച് ഒന്ന് കെട്ടിക്കണമെന്നും പിസി ജോർജ് പരിഹസിച്ചു. “നിങ്ങൾ ആ രാഹുലിനെ കൂടെ പിടിച്ചു കെട്ടിക്ക്, ആ ചെറുക്കൻ ഒന്ന് നന്നാവട്ടെ” എന്നായിരുന്നു പിസി ജോർജിന്റെ ഫേസ്ബുക്ക് പോസ്റ്റ്. രാഹുൽ ഗാന്ധിയല്ല, ഇത് പാലക്കാട് എംഎൽഎ രാഹുലാണെന്ന പ്രത്യേക കുറിപ്പോടെയാണ് പിസി ആഞ്ഞടിച്ചത്.
കുംഭമേളയിലൂടെ സോഷ്യൽ മീഡിയയിൽ വൈറലായ മൊണാലിസ ഭോസ്ലെയും കാമുകൻ മുഹമ്മദ് ഫർമാനും തമ്മിലുള്ള വിവാഹം കഴിഞ്ഞ ദിവസമാണ് തിരുവനന്തപുരത്ത് നടന്നത്. അരുമാനൂർ നയിനാർ ദേവക്ഷേത്രത്തിലെ ശ്രീനാരായണഗുരുവിന്റെ പ്രതിഷ്ഠയ്ക്ക് മുന്നിൽവെച്ച് നടന്ന വിവാഹത്തിന് സാക്ഷികളായി സിപിഎം സംസ്ഥാന സെക്രട്ടറി എം.വി. ഗോവിന്ദൻ, മന്ത്രി വി. ശിവൻകുട്ടി, എ.എ റഹീം എംപി എന്നിവർ എത്തിയിരുന്നു.
“വേടന്റെ വരെ കല്യാണം നടത്തിക്കൊടുത്ത സ്ഥിതിക്ക് നിങ്ങൾ ആ രാഹുലിനെയും കൂടി ഒന്ന് പരിഗണിക്കണം” എന്നാണ് പിസി ജോർജ് കുറിച്ചത്. രാഹുലിനെതിരെ മന്ത്രി ശിവൻകുട്ടിയും മറ്റും നേരത്തെ നടത്തിയ ‘കെട്ടിക്കൽ’ പരാമർശങ്ങൾക്കുള്ള മറുപടി കൂടിയാണ് പിസി ജോർജിന്റെ ഈ പരിഹാസം. രാഷ്ട്രീയ നിലപാടുകൾ ചർച്ച ചെയ്യുന്നതിന് പകരം വിവാഹ ബ്രോക്കർമാരുടെ പണിയാണ് ഇപ്പോൾ പാർട്ടിക്കാരും നേതാക്കളും ചെയ്യുന്നതെന്ന വിമർശനം സോഷ്യൽ മീഡിയയിൽ ഇതിനോടകം വൈറലായിക്കഴിഞ്ഞു. ഭാരതീയ സംസ്കാരത്തെയും ആചാരങ്ങളെയും തള്ളിപ്പറയുന്നവർ ഇപ്പോൾ ക്ഷേത്ര മുറ്റത്ത് കല്യാണം നടത്തിക്കൊടുക്കാൻ മത്സരിക്കുകയാണെന്നും പ്രതിപക്ഷ അനുകൂലികൾ ആരോപിക്കുന്നു.
