ഹലാൽ മാംസം വിൽക്കില്ലെന്ന തീരുമാനത്തെ തുടർന്ന് ഇന്ത്യൻ റെസ്റ്റോറന്റിന്റെ ഉടമയെ ലണ്ടൻ പോലീസ് അറസ്റ്റു ചെയ്തു.
ലണ്ടൻ ആസ്ഥാനമായി പ്രവർത്തിക്കുന്ന ‘രംഗ്രേസ്’ എന്ന ഇന്ത്യൻ റെസ്റ്റോറന്റിന്റെ ഉടമയായ ഹർമാൻ സിംഗ് കപൂറിനെയാണ് ലണ്ടൻ പോലീസ് അറസ്റ്റ് ചെയ്തത്. തന്റെ റെസ്റ്റോറന്റിൽ ഹലാൽ മാംസം വിൽക്കില്ലെന്ന അദ്ദേഹത്തിന്റെ നിലപാടിനെത്തുടർന്ന് ദിവസങ്ങളായി നടന്ന പ്രതിഷേധങ്ങൾക്കും വിവാദങ്ങൾക്കും പിന്നാലെയാണ് ഈ നടപടി.
ഹലാൽ ഭക്ഷണപദാർത്ഥങ്ങൾ വിൽക്കാൻ വിസമ്മതിച്ചതിനെത്തുടർന്ന് ഒരു വിഭാഗം ആളുകൾ തന്നെ ലക്ഷ്യമിടുന്നതായും ഭീഷണിപ്പെടുത്തുന്നതായും കപൂർ നേരത്തെ ആരോപിച്ചിരുന്നു. റെസ്റ്റോറന്റിന് പുറത്ത് പ്രതിഷേധക്കാർ തടിച്ചുകൂടുകയും ഭീഷണി മുഴക്കുകയും ചെയ്യുന്നതിന്റെ വീഡിയോകൾ അദ്ദേഹം സോഷ്യൽ മീഡിയയിൽ പങ്കുവെച്ചിരുന്നു. തന്റെ കുടുംബത്തിനും ബിസിനസ്സിനും എതിരെ നിരന്തരമായ അതിക്രമങ്ങൾ നടക്കുന്നുണ്ടെന്ന് അദ്ദേഹം അവകാശപ്പെട്ടിരുന്നു.
ശനിയാഴ്ച റെസ്റ്റോറന്റിനുള്ളിൽ വെച്ച് കപൂറിനെ പോലീസ് കൈവിലങ്ങ് വെച്ച് കൊണ്ടുപോകുന്ന ദൃശ്യങ്ങൾ പുറത്തുവന്നു. പോലീസ് വാനിലേക്ക് അദ്ദേഹത്തെ മാറ്റുന്ന വീഡിയോകൾ ഓൺലൈനിൽ വ്യാപകമായി പ്രചരിക്കുന്നുണ്ട്. ഹലാൽ വിൽക്കില്ലെന്ന തീരുമാനത്തിൽ ഉറച്ചുനിന്ന കപൂർ, പോലീസിനും പ്രതിഷേധക്കാർക്കുമെതിരെ ശക്തമായ നിലപാടാണ് സ്വീകരിച്ചിരുന്നത്. എന്നാൽ പൊതുസമാധാനത്തിന് ഭംഗം വരുത്തിയെന്നോ മറ്റ് നിയമപരമായ കാരണങ്ങളാലോ ആണ് പോലീസ് നടപടിയുണ്ടായതെന്നാണ് പ്രാഥമിക സൂചന.
